Kuryente sa Cagayan, maibabalik na!

TALAVERA, Nueva Ecija - Mahigit 20 lineman ng isang kooperatiba ng kuryente sa Luzon ang nagtungo kahapon sa Cagayan Valley region upang tumulong sa pagkukumpuni upang maibalik ang linya ng kuryente sa rehiyon matapos itong salantain ng bagyong ‘Ompong’ nitong Sabado.

Sa send-off ceremony ng Nueva Ecija Electric Cooperative (NEECO-I) at NEECO-II, binigyan ng kani-kanilang assignment sa Cagayan Electric Cooperative ang mga contingent ng bawat kooperatiba.

Ipinaliwanag ni Reynaldo Villanueva, presidente ng Central Luzon Electric Cooperative Association (CLECA), na maraming lugar pa rin sa Cagayan ang walang kuryente hanggang sa ngayon.

“Aabot na sa 900 poste ng kurytente ang natumba sa Cagayan 1, samantalang nasa 500 poste naman sa Cagayan-1,” sabi ni Villanueva.

Tatagal, aniya, ng isang buwan ang contingent sa kanilang assignment pero posible pang tumagal sakaling kailanganin.

Sinabi ni Villanueva na papasanin ng kooperatiba ang suweldo at lahat ng gastusin ng naturang contingent, habang manggagaling naman sa host cooperative ang mga materyales sa pagbabalik ng supply ng kuryente.