7 sugatan sa aksidente sa MRT

Sugatan ang pitong empleyado ng Metro Rail Transit-Line 3 (MRT-3) nang magkabanggaan ang dalawa nitong maintenance vehicles, na nagresulta rin ng pagkaantala ng biyahe ng mga tren, kahapon ng madaling araw.

Sa abiso ng MRT-3, nagsasagawa ng routine Overheard Catenary System (OCS) at tracks maintenance nang magkabanggaan ang dalawa nitong maintenance vehicles, na tinatawag na ‘unimogs’, sa pagitan ng Buendia Station at Guadalupe Station sa area ng Makati City, dakong 3:00 ng madaling araw.

Pitong lalaki, na kinabibilangan ng mga maintenance at security personnel at hindi pinangalanan, ang nasugatan sa aksidente.

Agad na isinugod sa VRP Medical Center ang mga biktima, na ang dalawa ay nagtamo ng broken shoulder habang nagtamo ng minor injuries ang limang iba pa.

Naialis sa lugar ang dalawang unimogs na sangkot sa aksidente sa ganap na 4:20 ng madaling araw.

Dahil dito, naantala ang mga biyahe ng mga tren dahil hindi kaagad nakapag-deploy ng mga tren sa riles.

Ayon sa MRT-3, sa ganap na 6:15 ng umaga nasimulan ang deployment ng mga tren, sa halip na 4:30 ng madaling araw, at 7:30 ng umaga naibalik sa normal ang operasyon ng mga tren.

Upang maalalayan ang mga pasahero at maihatid sa kani-kanilang destinasyon, nag-deploy ng dagdag na augmentation buses ang Land Transportation Franchising Regulatory Board (LTFRB), Metro Manila Development Authority (MMDA), Land Transportation Office (LTO), at Highway Patrol Group (HPG).