Phone numbers ng ministers, naisapubliko

LONDON (AFP) – Naisapubliko ang phone numbers at iba pang personal details ng senior ministers ng Conservative party ng Britain dahil sa pagkakamali sa isang app security nitong Sabado, kabilang ang sa top Brexiteers na sina Michael Gove at Boris Johnson.

Ilang MPs ang iniulat na nakatanggap ng nuisance calls matapos mapasok ang kanilang profiles sa official mobile application para sa annual party conference, na magsisimula ngayong weekend.

Dahil sa security breach, napasok ng publiko ang profiles ng mga politiko gamit lamang ang kanilang email address at nasilip at na-edit ang mga nakaimbak na datos.

Ang profile picture ni dating foreign secretary Johnson ay sandaling pinalitan ng pornography at ang kanyang job title ay naging mga mura at insulto.

Ang litrato naman ni Environment Secretary Gove ay naging mukha ni media tycoon Rupert Murdoch, dati niyang employer nang siya ay journalist.

Kabilang sa mga unang nag-ulat ng pagkakamali si Dawn Foster, columnist ng pahayagang The Guardian.

‘’The Tory conference app allows you to log in as other people and view their contact details just with their email address, no emailed security links, and post comments as them…Fantastic,’’ tweet niya, gamit ang colloquial name ng partido.

Isang tagapagsalita ng Conservative party ang humingi ng paumanhin sa breach, sinabing naresolba na ang technical issue at ‘’ the app is now functioning securely’’.