Waitress kinatay ng customer
Patay ang isang waitress nang pagsasaksakin ng kostumer na nagalit nang tanggihan nito ang alok na lumabas, habang kritikal naman ang kanilang kahera nang tarakan din ng suspek matapos na umawat sa krimen sa isang KTV bar sa Tondo, Maynila, kamakalawa.
Dead on the spot si Anecita Sialongo, 41, waitress, habang under observation sa ospital si Celia Tamayo, senior citizen, kapwa nagtatrabaho sa isang KTV bar na matatagpuan sa Juan Luna Street sa Tondo.
Samantala, arestado naman ang suspek na si Robert Nocos, nasa hustong gulang, ng P. Herrera St., sa Tondo.
Sa ulat ng Manila Police District (MPD)-Crimes Against Persons Investigation Section (CAPIS), na pinamumunuan ni Police Chief Insp. Rommel Anicete, naganap ang krimen sa loob ng pinagtatrabahuhang bar ng mga biktima, pasado 9:00 ng gabi.
Sa salaysay ng isang waitress na nakasaksi sa krimen, pumasok sa bar ang suspek at nang makainom ay inalok si Sialongo na sumama sa kanya sa labas.
Tinanggihan umano ng biktima ang alok ng suspek, na ikinagalit nito at dali-daling lumabas sa KTV bar.
Makalipas ang ilang sandali, bumalik ang suspek na armado na ng kutsilyo at apat na beses na pinagsasaksak ang biktima.
Sinubukan ni Tamayo na awatin si Nocos, ngunit pati siya ay pinagsasaksak.
Agad na tumakas si Nocos at umano’y nagpakalbo pa upang hindi makilala ng mga pulis ngunit nadakip rin sa follow-up operation.
Mariin nitong itinanggi ang krimen at sinabing natutulog lang siya sa kanyang bahay nang hulihin ng mga pulis.
Sasampahan si Nocos ng mga kasong homicide at frustrated homicide.