11 undocumented Indonesians, nalambat
Labing-isangundocumentedIndonesians na ilegal na pumasok sa bansa ang inaresto ng Philippine National Police (PNP) sa Sarangani, nitong Martes ng gabi.
Kinilala ni Chief Supt. Eliseo Rasco, regional director ng Soccsksargen Police Regional Office (PRO-12), ang mga inaresto na sina Harjono Makalisang, 30; Jeynes Ambalao, 34; Jamudin Sarapil Pangumpia, 36; Donni Riksmen Sitompul, 38; Karlos Sasahi, 47; Kostan Tumei Manake, 47; Oscar Tempomona Masoa, 47; Marthin Batasina, 51; Marcos Bastian, 52; Sapar Haribae Maulana, 53; at Tara Hengkeng Legesang, 59, pawang mula sa Sulawesi, Indonesia.
Ayon kay Rasco, inaresto ang mga Indonesians ng pinagsanib na puwersa ng Sarangani Provincial Mobile Force Company, Provincial Intelligence Branch at Glan Municipal Police Station, sa pakikipagtulungan sa Bureau of Immigration (BI) sa Sitio Calanasan, Barangay Taluya, Glan, Sarangani, dakong 9:00 ng gabi.
Naganap ang pag-aresto ilang oras matapos na mag-courtesy visit ang isang grupo ng mga pulis mula sa Indonesia North Sulawesi Regional Police (NSRP), sa pamumuno ni Senior Supt. H. Yohanes Soehartono S.I.K., hepe ng operations of NSRP, sa PRO-12, nitong Martes ng madaling araw.
Kabilang sa mga tinalakay, ayon kay Rasco, ay ang isyu ng mga hindi dokumentadong Indonesians na nakatira sa Pilipinas.
Isiniwalat ng PRO-12 chief na ang mga Indonesians ay ilegal na namamalagi sa bansa ng mahigit isang linggo matapos ang pagaresto.
Dumating ang grupo sa bansa nitong Setyembre 23, 2018 ngunit nabatid ng awtoridad na hindi sumailalim sa tamang dokumentasyon ang mga ito.
Kinumpirma ni Joyce Kandice Villaraza, Alien Control Officer mula sa BI-Sarangani, na ang mga dayuhan ay hindi dokumentado.