13 bata nasagip sa recycling firm

Nasagip ng mga tauhan ng National Bureau of Investigation (NBI) ang 13 na menor de edad, na sapilitang pinagtrabaho sa isang plastic recycling facility sa Cavite, kamakailan.

Sa pahayag ni NBI spokesman at Deputy Director Ferdinand Lavin, nailigtas ng mga tauhan ng NBIInternational Operations Division ang 13 bata mula sa Ever Fortune Recycle Corporation sa Carmona, nitong Martes.

Aniya, ang mga nasagip ay nasa edad 8-16.

Natimbog naman sa naturang operasyon ang mga opisyal ng kumpanya na sina Justin Co, manager; Marylou Olivay; Merrycar Bautista; at Vivian Pulia.

Nasa kustodiya na ng NBI ang apat matapos silang kasuhan ng paglabag sa RA 9206 na naamyendahan ng RA 10364 (Expanded Anti-Trafficking in Persons Act of 2012) at RA 7610 (Special Protection of Children Against Abuse, Exploitation and Discrimination Act).

Nasa pangangalaga na ng Department of Social Welfare and Development (DSWD) ang mga nasagip na bata, ayon kay Lavin.

Sinalakay ang lugar batay na rin sa reklamo ng dalawang trabahador na sinibak ng kumpanya, matapos na madiskubreng nagreklamo sa Department of Labor and Employment (DOLE) dahil sa umano’y maliit na suweldo, walang benepisyo at hindi makataong lugar na pinagtatrabahuhan ng mga ito.

“Consent is immaterial dahil ang pinagsmantalahan dito ay menor de edad at vulnerable sector of society. Nawawalan na sila ng capacity to give consent dahil sa kanilang kahinaan,” dagdag pa ni Lavin.