Catalan, kampeon sa ‘BETS’ VII
WALANG pangakong binitiwan si Ruel Catalan at sa gabi ng laban, hinayaan niyang ang lakas ang magsalita para patunayan na isa siya sa dapat katakutan sa local mixed martial arts scene.
Dinomina ng Catalan Fighting System bet ang karibal na si George Mascardo ng Dipolog Top Team tungo sa impresibong panalo sa main event ng Casino Filipino (CF) Battle Extreme Tournament of Superstars (BETS) VII kamakailan sa CF Manila Bay sa Ermita, Manila.
Simbilis ng kidlat ang galaw at sinlakas ng kalabaw ang katawan ni Catala para mapatigil si Mascardo may 1:18 sa orasan ng first round at angkinin ang ikawalaong panalo bilang professional MMA fighter. Natikman naman ni Mascardo ang ikatlong kabiguan sa pitong laban.
Sa co-main event, napanatili ni Mark Gregory Valerio ng One Revolt MMA ang malinis na marka sa pitong laban via referee-stopped contest kontra Mario Sismundo may 3:56 sa second round.
Pumutok ang kaliwang kilay ni Sismundo nang tamaan ng right cross ni Valerio dahilan para pumagitna ang referee at itigil ang laban.
Naitala naman ni Norman Agcopra ng Metacore Elorde NAIA ang first round technical knockout kontra Farmon Gavarov ng Korean Top Team/Top Gym BF.
Nakabawi naman ang kababayan ni Gavatov na si South Korean Hye Sun Kim ng BK Wang Ho/Top Gym BF nang maitala ang rear-naked choke may 59 segundo sa first round kontra sa liyamadong si Anne Kristelle Sabadlab ng Mindanao Ultimate Mixed Martial Arts.
Umiskor din ang isa pang Korean na si Won Il Kwon ng Kwang Gym/Extreme Combat via referee-stopped contest kontra Team RLAN’s Herbert Faurillo sa first round.
Sa iba pang laban, nagwagi si Rick Lucena (Yawyan Fervilleon Matayog/Team Kampilan) kontra Reinier Gervacio via refereestopped sa second round, habang kumana si Ariane Fantellanan (Catalan Fighting System) kontra JB Baldonasa (Team Hyper MMA) sa third round.
Nanaig si Moises Ilogon (Subsport Ph) kontra Lorenzo Artillaga (Yawyan Kampilan) via rear naked choke sa second round, habang nakuha ni Jervie Tiongco (Team Olongapo) ang unanimous decision kontra Mike Paiz (Elorde).
“The fights were as good as advertised, and we hope to continue drawing the fancy of mixed martial arts fans in the coming CF BETS series by lining up more exciting matches bannered by victoryhungry ring gladiators,” pahayag ni Philippine Amusement and Gaming Corporation (PAGCOR) Assistant VP for Entertainment Bong Quintana.
Katuwang ng PAGCOR ang Casino Filipino, Universal Reality Combat Championship (URCC), at Live Artists Production.