3 grupo tinututukan sa PDEA ambush

Nakatuon ang imbestigasyon ng pamahalaan sa tatlo umanong drug syndicate, na pinaniniwalaang nasa likod ng pananambang sa grupo ng Philippine Drug Enforcement Agency (PDEA) agents sa Kapai, Lanao del Sur, nitong Biyernes ng hapon.

Malaki ang paniwala ni PDEA Director General Aaron Aquino na paghihiganti ng mga nasasagaan nilang drug groups ang dahilan ng pananambang sa Barangay Malna sa nasabing bayan.

Aniya, sinimulan na nila ang surveillance operations laban sa naturang mga grupo sa Lanao del Sur.

Sa paunang report ng awtoridad sa Autonomous Region in Muslim Mindanao (ARMM), kinilala ang mga PDEA agent na sina Kenneth Tabulo, Kristine Mae Torlao, Lores Joy Amar, Binzo Dipolla, at Diobel Pacinio.

Iniimbestigahan na rin umano nila ang hindi pagresponde ng mga pulis sa lugar ng pinangyarihan ng insidente.

Bago naganap ang insidente, nasa likod pa umano ng sinasakyan ng mga PDEA agent ang mobile car ng pulis.

Nangangamba naman ang Moro Consensus Group sa posibilidad na gamitin ng ilang opisyal ng pamahalaan ang nasabing insidente upang maisulong ang pagpapalawig ng martial law sa Mindanao.

“We don’t want this incident to be used by hawkish officials in the Government to justify the extension of Martial Law in Mindanao,” ayon kay Drieza Lininding, convener ng nasabing civil society group.