45% ng Pinoy: May sakit si Digong
Nasa 45 porsiyento ng mga Pilipino ang naniniwalang may problema sa kalusugan si Pangulong Rodrigo Duterte.
Ito ang lumalabas sa survey ng Social Weather Stations (SWS) nitong September 15-23.
Sa 1,500 Filipino adults na nainterview, 45% ang nagsabing naniniwala silang may health problem ang Pangulo, 26% ang hindi naniniwala, habang 29% ang “undecided” sa isyu.
Samantala, 55% naman ang nagsabing nababahala sila na magkaroon ng problema sa kalusugan ang Presidente, habang 44% ang hindi nababahala.
Lumalabas din sa survey ng SWS na 61% ng mga Pilipino ang naniniwalang ang kalusugan ng Pangulo ay isang “public matter”, o usaping mahalaga sa publiko kaya dapat ipaalam sa mamamayan ang lahat tungkol dito; 33% ang nagsabing ito ay pribadong paksa at hindi na kailangang ipaalam sa publiko; habang 6% ang walang opinyon.
Pinakamarami ang nagsabi na may problema sa kalusugan ang Pangulo sa Metro Manila sa +31, na sinundan ng Balance Luzon sa +21, Visayas sa +14, at pinakakaunti sa Mindanao sa +12.
Gayunman, pinakamarami sa Mindanao ang nag-aalala sa kalusugan ng Pangulo sa +61, na sinundan ng Metro Manila sa +59, Balance Luzon sa +53, at Visayas sa +51.
Ang resulta ng survey ng SWS ay inilabas sa kasagsagan ng mainit na isyu tungkol sa kumpirmasyon ni Pangulong Duterte na nagpatingin siya sa Cardinal Santos Medical Center nitong Miyerkules.