Roque, pinipigilang mag-resign

Ipagpapaliban kaya ni Presidential Spokesman Harry Roque ang plano niyang tumakbong senador sa 2019 at sa halip ay mananatili sa gobyerno?

Inamin ni Presidential Communications Secretary Martin Andanar na sinisikap ng Palasyo na kumbinsihin si Roque na pamunuan ang panukalang Office of the Press Secretary (OPS), at tila makukumbinsi siyang manatili.

Sinabi ni Andanar na nagsumite siya kay Executive Secretary Salvador Medialdea ng draft executive order na bumubuhay sa OPS, at kinikilala ang kahalagahan ni Roque sa communication efforts ng gobyerno.

“Isa sa mga napag-usapan namin ay kailangan makumbinse namin si Secretary Roque na huwag nang tumuloy sa kanyang Senate plans, sa kanyang pagtakbo sa 2019,” aniya sa panayam sa radyo.

“Pinag-iisapan pa niya. Sabi ko bilisbilisan mo pag-iisip mo dahil malapit na yung filing pero mukha naman yung mga nakaraang araw ay medyo nako-convince na siya na huwag nang tumakbo,” dugtong niya.

Nauna nang hinikayat ni Pangulong Rodrigo Duterte si Roque na talikuran na ng planong tumakbo sa Senado sa halalan sa susunod na taon dahil sa maliit ang tsansang siya ay mananalo at sa halip ay inalok ng bagong trabaho.

Humingi si Roque ng panahon para pagaralan kung siya ay magbibitiw at tatakbo o mananatili sa administrasyon. Inaasahang ipapahayag niya ang kanyang desisyon ngayong araw.

Pinag-isipan ni Roque na magbitiw matapos paglihiman kaugnay sa pagbisita ng Pangulo sa ospital kamakailan.

Samantala, sinabi ni Andanar na nakahada siyang magparaya para pamunuan ni Roque ang OPS na papalit sa Presidential Communications Operations Office (PCOO).

“Walang problema kasi naintindihan ko yung importansya na hindi umalis si Secretary Roque at isa nga ako na nagko-convince sa kanya na huwag na tumuloy. Mayroon pa nama 2022,” ani Andanar.