Laylo, nanguna sa hataw ng Army

TINALO nina Grandmaster Darwin Laylo, National Master lawyer Bob Jones Liwagon at Kevin Arquero ang kani-kanilang katunggali para pangunahan ang Philippine Army sa 7.5-4.5 victory kontra sa Philippine National Police sa third round ng AFP-PNPPCG Olympics 2018 Chess Team Championships nitong Lunes sa PNP Sports Center sa Camp Crame, Quezon City.

Tangan ni Laylo, isang military Corporal, ang puting piyesa, ginapi niya si PO3 Jerry Tolentino sa 32 moves ng King’s Indian defense Saemitch variation.

Habang si Liwagon, may rango na Captain at nasa pangangasiwa ni Army Judge Advocate (AJA) Colonel Maria Victoria Girao, ay matiyagang dumepensa sa kabuuan ng laro tungo sa 42-move victory via French defense kontra kay PINSP Ronald Agabao.

Nangibabaw naman si Arquero, isang Private, kontra PO1 Neptali Batucan.

Nasilayan din si LTC Lebrito Olmuguez na nakaungos kay PSUPT Jaime Osit Santos, habang pinigil naman ni PFC Antonio Chavez Jr. si SPO3 Ruvilo Paulin at nakalusot si PVT Alfred Rapanot kay PO2 Jones Maghuyop.

Nakihati naman ng puntos si LTC Perpetuo Tan Jr. kay PSUPT Antonieto Canete maging si 1LT Irene Rivera kontra kay PSUPT Ronilo Datu at GM candidate PVT Ronald Dableo kontra kay National Master SPO2 Ali Branzuela.

Nagbigay naman ng magandang laban sa Philippine National Police na ang mga coaches ay sina Jomes Mendoza Pascua at Renato “Buboy” Abalos ay si PSI Horizon Villanueva na nanalo kontra kay CPT Marlou Daguio, si PINSP Ferdinand Aterrado na namayani kay LTC Danilo Barba at si National Master PO2 Rolando Andador na ginulat si International Master PVT Joel Pimentel.

Ang Philippine Army chess team na ang mga coaches ay sina Ildefonso “Ponching” Datu at National Master Carlo Rosaupan ay nanaig din sa Philippine Airforce Chess Team, 8.5-3.5.

Habang una naman nagwagi ang Philippine National Police sa Philippine Coast Guard, 12-0, at nagtala din ng via default win sa Philippine Navy, 12-0.

Ang tournament director ay si Maj.Libertino, habang si ang Chief Arbiter ay si IA Patrick Lee at assistant si NA Roy Madayag sa Standard 90 minutes plus 30 seconds increment time control, double Round-robin format na itinataguyod ng National Chess Federation of the Philippines (NCFP).