Nayre, ‘di umubra sa Youth Olympics

BUENOS AIRES – Kinapos ang kampanya ni Jann Mari Nayre na makausad sa medal round ng table tennis event ng 2018 Youth Olympic Games matapos ang kabiguan kontra Rio de Janeiro Olympian Kanak Jha ng United States nitong Lunes (Martes sa Manila) sa Table Tennis Arena of the Technopolis dito.

Winalis ni Jha si Nayre, 13-11, 11-8, 15-13, 11-8, sa final match ng Group B men’s singles preliminaries sa torneo na nagtatampok sa pinakamahuhusay na under-18 paddlers sa mundo.

Matapos ang matikas na opening game kontra Nicolas Burgos ng Chile, natikman ng 18-anyos pride mula sa Baybay, Leyte ang magkakasunod na kabiguan para mabalahaw sa kampanyang makausad sa round of 16.

“Maganda ang nilaro ko kanina pero talagang magaling ang kalaban (Jha),’’ pahayag ni Nayre, unang Pinoy table netter na nakalaro sa Youth Olympics.

Tunay na beterano sa laban si Jha, ranks No. 1 in the world sa under-18 category, na regular na nakalalahok sa international meet sa Asia, America at Europe.

“Crucial talaga ang laban ko against Austria. This is a learning experience para sa akin,’’ pahayag ni Nayre, quarterfinalist sa 2017 Southeast Asian Games sa Kuala Lumpur, Malaysia at nakausad sa round of 32 sa nakalipas na Asian Games sa Jakarta, Indonesia.

Tulad nang namayapang si 2016 Olympian na si Ian Lariba, ginabayan si Nayre ni Korean coach Kwon Mi Sook.

Hindi rin pinalad sa kanikanilang kampanya sina FilipinoNorwegian Christian Tio na tumapos sa ika-anim sa 12 kalahok sa first round ng kiteboarding competitions, habang pang-anim sa walong swimmer sa kanyang heat sa 100-meter freestyle ang US-based Pinay na si Nicole Oliva sa naisumiteng oras na 57.33 segundo.

Muling sasalang si Oliva sa 800m free sa Martes (Miyerkules sa Manila) habang sisimulang din ni Asian Games double-gold medalist Yuka Saso at Carl Jano Corpus ang kampanya sa golf competition sa Hurlingham Club, gayundin si fencer Lawrence Everett Tan sa men’s foil event.