Koko, Ka Freddie, Doc Willie, naghain na ng COC
Umarangkada na kahapon ang paghahain ng kandidatura para sa May 13, 2019 National and Local Elections (NLE).
Bagamat unang araw pa lang ng pagsusumite ng Certificate of Candidacy (COC), dumagsa na kahapon sa main office ng Commission on Elections (Comelec) ang mga kandidato at kanilang mga tagasuporta para gawing opisyal ang kanilang kandidatura.
Sa Comelec main office sa Intramuros sa Maynila, kauna-unahang naghain ng COC para sa reelection si Senator Aquilino “Koko” Pimentel III, national president ng Partido Demokratiko Pilipino-Lakas ng Bayan (PDP-Laban).
Dumating wala pang 8:00 ng umaga kasama ang fiancée niyang si Katherine Yu, sinabi ni Pimentel na maaga siyang naghain ng kandidatura dahil magiging abala na siya sa mga susunod na araw dahil sa kasal nya sa Oktubre 18.
“Maaga tayo pumunta because I’m getting married next week, so gusto ko tapos na ito,” sabi ng dating Senate President.
Naghain din ng COC ang folk singer na si Freddie Aguilar, kilalang tagasuporta ni Pangulong Duterte, at sinabing maaga siyang naghain ng kandidatura dahil pupunta siya sa Canada para sa ilang pagtatanghal doon.
Aniya, kapag pinalad siyang maluklok sa puwesto ay isusulong niya ang proteksiyon ng mga entertainer sa bansa, at itataguyod ang pagpapalit ng gobyerno tungo sa pederalismo.
Kakandidato rin sa pagkasenador ang sikat na cardiologist na si Dr. Willie Ong, na nasa ilalim ng Lakas-Christian Muslims Democrats (Lakas-CMD) party; gayundin ang dating pulis at mayor ng Pagsanjan, Laguna na si Abner Afuang, at si Bayan Muna Chairman Neri Colmenares.
Si Kabayan Party-list Rep. Ron Salo ang unang party-list nominee na nagsumite ng kandidatura sa Comelec, kasunod si Partido na Bayan ang Bida (PBB) Party-list Rep. Imee Cruz.
Samantala, ikinatuwa ni Comelec Spokesman James Jimenez na naging mapayapa ang unang araw ng COC filing, organisado at nakasusunod sa guidelines ang mga kandidato sa paghahain ng COC.
Gayunman, nagkaroon ng bahagyang kalituhan ng ilan sa mga kandidato ay gumamit ng lumang forms, kaya hindi tinanggap ng Comelec ang mga nasabing form, bagamat binigyan naman ng komisyon ng pagkakataon ang kandidaton na maisaayos ang isinumiteng form.
Dakong 8:00 ng umaga nang magbukas ang Comelec para sa COC filing at nagsara ganap na 5:00 ng hapon.
Tatanggap ang Comelec ng COC hanggang sa Miyerkules, Oktubre 17.