PUV modernization, tuloy –Tugade
Sa kabila ng mga batikos at ulat hinggil sa pagkaantala, nanindigan ang Department of Transportation (DOTr) and the Land Transportation Franchising and Regulatory Board (LTFRB) na magpapatuloy ang modernization program para sa mga pampublikong sasakyan “with no delays.”
“We shall continue with the PUV Modernization Program. For the sake of this country, let us have political will. No delays, no postponement, let us get this done,” pahayag ni Transportation secretary Arthur Tugade.
Ipinahayag ito ni Tugade kasunod ng mga balita na ipagpapaliban muna o maantala ang modernization program na inilunsad nitong nakaraang taon.
Taliwas sa naunang mga ulat na hindi pa umano handa ang pamahalaan para sa pagapatupad ng programa, iginiit ng kalihim na handa na ang lahat para sa implementasyon nito.
“Handa po kaming ipatupad ito. Hindi naman po siguro kami kukuha ng bato na ipupukpok sa sarili namin. Kung dati, hanggang plano lang, ibahin ninyo po kami,” saad no Secretary Tugade.
Sinegundahan naman ni LTFRB Chairman Atty. Martin Delgra III ang naging pahayag ni Tugade, na sinigurong nagsimula na ang programa ng ahensiya at magpapatuloy.
“Challenge accepted. I will face it with courage. No doubt, it’s hard. There are many controversies and doubts. But I think it will be beneficial to many,” ani Delgra.
PAGDINIG SA PUVMP
Sa pagdinig kamakailan ng Senate committee on public services hinggil sa PUV modernization program, sinabi ni Senator Grace Poe na hindi pa handa ang pamahalaan na i-phase out ang mga PUV na hindi tumatalima sa modernization requirements, lalo’t maging ang kanilang mga hinihiling ay walang kalinawan.
Ipinagdiinan ni Poe na hindi pa rin alam ng mga operator at mga driver kung paano magagamit ang loan program ng gobyerno para makabili ng mga eco-friendly jeepney, na nagkakahalaga ng halos P1.8 milyon.
KAILANGAN NG SUPORTA
Samantala, hinikayat naman ni Tugade ang ilang opisyal ng pamahalaan at mga lider ng transport group na simulan nang tumulong at sumuporta sa modernization program.
“We have taken the initial bold step towards progress, and we need leaders who can tell us where else we can do better, not tell us why it cannot be done. Commuters are already waiting for so long, yet we are still full of excuses until now,” saad niya.