‘Human capital’ rankings inilunsad ng World Bank

NUSA DUA, Indonesia (Reuters) – Inilunsad nitong Huwebes ng World Bank Group ang isang bagong sistema para iranggo ang mga bansa batay sa kanilang tagumpay sa pagdedebelop ng human capital, isang pagsisikap na humihikayat sa mga gobyerno na mas epektibong mamuhunan sa edukasyon at healthcare.

Ipinakikita sa “Human Capital Index” ng bangko na ang mararalitang bansa sa Africa ang pinakamalala sa rankings, sa pagpuwesto ng Chad at South Sudan sa pinakamababa, habang nangunguna sa listahan ang Singapore, sinusundan ng South Korea, Japan at Hong Kong.

Ina-assess ng rankings, ibinatay sa health, education at survivability measures, ang future productivity at earnings potential ng mga mamamayan mula sa 157 nasyon na miyembro ng World Bank, at ng mga bansa na may potensiyal ng economic growth.

Pinasinayaan ang index sa annual meetings ng World Bank at International Monetary Fund sa isla ng Bali sa Indonesia.

Natuklasan nito na 56 porsiyento ng mga batang isinisilang ngayon ay hindi makakamit ang mahigit kalahati ng kanilang potential lifetime earnings dahil hindi sapat ang pamumuhunan ng mga gobyerno upang matiyak na ang kanilang mamamayan ay malusogm edukado, at handa sa nagbabagong lugar ng trabaho.

Umaasa si World Bank Group President Jim Yong Kim na mahihikayat ng bagong index ang mga gobyerno na magsagawa ng mga hakbang para tumaas sa rankings, gaya ng ginagawa nilang pagsisikap para sa sikat na “Doing Business” survey ng bangko, na iniraranggo ang mga bansa batay sa magandang kondisyon ng pagnenegosyo.

“This is about drawing their attention to a crisis that we think is real. This is connected to productivity, this is connected to economic growth,” ani Kim.

Sinusukat ng index ang mortality rate para sa mga batang nasa limang taon pababa, early childhood stunting rates dahil sa malnutrisyon at iba pang dahilan, at health outcomes batay sa proportion ng mga 15-anyos na nabuhay hanggang sa edad na 60. Sinusukat din nito ang educational achievement ng bansa batay sa taon ng pag-aaral na inaasahang matamo ng bata pagsapit sa edad na 18, kasama ang relative performance ng bansa sa international student achievement tests.

Sinabi ni Kim na mayroong 28 bansa, mula Indonesia hanggang Lesotho hanggang Ukraine, ang lumagda bilang “early adopters” ng index upang makipagtulungan sa World Bank na magbalangkas ng mga plano para mapabuti ang kanilang pamumuhunan sa kalusugan at edukasyon.

Nagbabala ang bangko na buburahin ng automation at artificial intelligence ang maraming low-skilled jobs sa mga susunod na taon, kayat mas mahihirapan ang mga tao na may mababang antas ng edukasyon at mahinang kalusugan na makipagkompetensiya.