Kapamilya vs Kapamilya
PUBLIC relations nightmare ang pagsasampa sa korte ni Gretchen Fullido ng sexual harassment sa dating ABS-CBN news executive na si Cheryl Favila, dating news segment producer na si Maricar Asprec at libel cases laban sa ABS-CBN news executives na sina Ces Drilon at Venancio Borromeo, at reporter na si Marie Lozano.
Kailangan mo lang pasadahan ang napakaraming discussion threads sa social media para malaman ang magnitude ng kontrobersiya.
Hindi kaaya-aya ang nabubuong public perception sa Dos dahil dito.
Naalala tuloy namin ang binuong mediation committee ni Ms. Maloli Espinosa noong siya pa ang vice president ng government and corporate affairs and corporate communications. Papel ng mediation committee na pagharap-harapin ang nagkakairingan na mga artista o empleyado para magkasundu-sundo at mabigyan ng instant justice kung mayroon mang naagrabyado.
Malaki ang nagagawa ng mediation committee para agarang maapula ang apoy sa pagsisimula pa lamang at naiiwasan ang sunog. Nipping the scandal in the bud, wika nga. Tumutubo pa lang ang gulo, putulin na para hindi na umabot sa punto na naging malaking puno pa ito. Corporate communications ang nagtitimon noon sa mediation committee, dahil sila ang nakakaalam sa costly consequences ng mga kontrobersiya kapag pinagpistahan pa ng publiko. Ngayong nakapagsampa na ng kaso si Gretchen Fullido, labu-labo na sa pagsagot ang mga inaakusahan niya at ang nakakalungkot, kung sinu-sino ang iba pang mga kasamahan nilang nadadamay.
Pati pananahimik sa isyu ng ibang female personalities sa network nila, kinukuwestiyon. May write-ups nang hindi na pala pinapansin ng mga katrabaho si Gretchen.
Hindi makatutulong sa magandang image ng ABS-CBN na sila-silang nagtatawagan ng Kapamilya ay labu-labo na ang away. Nakaka-miss tuloy ang dating corporate communications head ng ABS-CBN dahil namasdan namin noon na suwabe niyang nahahawakan ang ganitong mga krisis.