Pamumulitika at paghihiganti
ANUMAN ang sabihin ng sinuman, hindi nagbabago ang aking paniniwala na ang nagaganap na mga karahasan na tinatampukan ng kahindik-hindik na pagpatay ay nababahiran ng pamumulitika at paghihiganti. Ibig sabihin, ang naturang malalagim na pangyayari ay bahagi ng isang political culture, lalo na ngayong napipinto ang 2019 midterm elections; ngayong nagsimula na ang paghaharap o filing ng certificate of candidacy (COC) ng mga kakandidato sa naturang halalan.
Sa kabila ng nakapanghihilakbot na mga krimen, kapuna-puna ang pagkukumagkag ng mga pulitiko sa paghahanda ng kani-kanilang mga kandidatura. Tila hindi alintana ang mga panganib na kanilang susuungin sa pangangampanya; maaaring sila ay naaarmasan, wika nga, ng matapat na hangaring makapaglingkod sa ating mga kababayan. Hangarin nila marahil na maging katuwang ng administrasyon sa paglikha ng isang malinis at matatag na gobyerno.
Hindi rin maiaalis ang taliwas na impresyon na ang ilang pulitiko ay may makasariling adhikain upang mangagaw lamang ng kapangyarihan; upang isulong ang kanilang mga plataporma na sa kanilang pag-aakala ay magiging katanggap-tanggap sa sambayanan. Anuman ang kanilang mga intensyon, ang pagkandidato ng sinuman ay bahagi ng isang malusog na demokrasya na marapat lamang maghari sa iba’t ibang sulok ng kapuluan.
Gayunman, hindi rin maiaalis na tayo ay mangamba sa malalagim na political crime na nagaganap sa ating mga komunidad. Halos arawaraw, binubulaga tayo ng walang habas na pamamaslang ng mga pulitiko na sinasabing naghahangad maglingkod sa bayan. Hindi na ako tutukoy ng pangalan ng mga biktima ng pananampalasan alangalang sa katahimikan ng kanilang mga kaluluwa. Isang Vice Mayor sa Cavite, halimbawa, ang pinaslang dahil lamang umano sa kanyang hangaring kumandidato bilang Alkalde ng kanyang bayan. Isa ring nanunungkulang Mayor sa isang bayan sa La Union ang hindi rin pinaligtas ng kriminal. Maging ang mga barangay chairman at iba pang kagawad na sinasabing nais ding pumalaot sa pulitika ay hindi pinatatawad ng mga kampon ni Satanas.
Maging ang aming kalalawigang Alkalde ng Gen. Tinio sa Nueva Ecija ay biktima rin ng tinatawag na political killings. Sa bahaging ito, mawalang galang na, hindi ko rin malilimutan ang buong kalupitang pagpatay sa aking kapatid – si Mayor Rogelio Lagmay ng Zaragoza, Nueva Ecija – na biktima ng tinaguriang noon-time massacre sa aming lalawigan.
Anupa’t ang nabanggit na karumaldumal na mga krimen ay natitiyak kong bunsod ng mga pamumulitika at paghihiganti na bahagi ng madugong political culture na malaon nang umiiral sa ating bansa.