Bato kandidato; ‘enlightenment’ pa kay Bong Go
Naghain na kahapon ng kandidatura sa Commission on Elections (Comelec) main office sa Intramuros, Maynila, si dating Philippine National Police (PNP) chief at kare-resign lang na Bureau of Corrections (BuCor) director na si retired Gen. Ronald “Bato” Dela Rosa, para kumandidatong senador.
Matapos kumonsulta sa feng shui expert, sinabi ni Dela Rosa na nagdesisyon na siyang kumandidato para senador, at tututukan niya ang peace and order sa bansa.
“The sun (ayon sa feng shui expert) is directly above you... So, lahat ng energy ng sun mapupunta sa ulo ni Bato. Wala pang buhok, so lahat ng energy nandyan,” biro ni Dela Rosa, na umani ng halakhakan ng mga miyembro ng media.
Pinalitan si Dela Rosa ni Office of Civil Defense Deputy Administrator Nicanor Faeldon bilang bagong BuCor director.
Sinabi naman kahapon ni Special Assistant to the President Bong Go na pinag-iisipan pa niya kung kakandidato siya sa susunod na taon.
“Pinag-iisipan ko pa. Naghihintay ako ng enlightenment sa Panginoon,” sinabi kahapon ni Go.
Naghain na rin kahapon ng kanyang certificate of candidacy (COC) si presidential son at dating Davao City Vice Mayor Paolo Duterte para sa pagkandidato bilang kongresista sa unang distrito ng Davao City.
Dumating si Duterte sa Commission on Elections (Comelec) office sa Magsaysay Park, dakong 12:00 ng tanghali, kasama ang kanyang kapatid na si incumbent Mayor Sara Duterte-Carpio.
Nagbitiw naman sa posisyon si Bureau of Immigration (BI) Deputy Commissioner Marc Red Mariñas upang kumandidato bilang alkalde ng Muntinlupa City.
Si Mariñas, kasalukuyang namumuno sa Port Operations Division (POD) ng ahensiya, ay maghahain ng kandidatura sa Lunes.
Sa Pasay, buhay na buhay naman ang politicial dynasty makaraang apat na miyembro ng pamilya Calixto ang naghain ng kani-kanilang COC.
Kakandidatong alkalde si Pasay Rep. Imelda “Emi” Calixto-Rubiano, habang ang kapatid niyang si incumbent Mayor Antonio Calixto ay kakandidatong kongresista.
Tatakbo naman sa pagkakonsehal ang anak ng alkalde na si Mark at pamangkin na si Joey.