Mag-live-in partners, huli sa R50K ‘shabu’
Arestado ang umano’y miyembero ng Amin Buratong drug syndicate at live-in partner nito matapos na masamsaman ng P50,000 halaga ng hinihinalang shabu sa Pasig City, nitong Huwebes.
Nagsilbi ng search warrant ang mga tauhan ng Eastern Police District Drug Enforcement Unit (DDEU), District Special Operations Unit (DSOU) at mga tauhan ng Pasig City Police laban kina Elden Piamonte, 38; at Adora Santos, 39 sa No. 54 San Bernando Street, Barangay San Juaquin, Pasig, bandang 11:00 ng umaga.
Ayon kay EPD director Chief Supt. Bernabe Balba, si Piamonte ay miyembro ng Buratong drug syndicate— isang narcotics group na pinamumunuan ni Amin Buratong na nag-o-operate ng shabu “tiangge” sa Pasig City bago ito ipasara nang siya ay maaresto noong 2006.
“According to the District Intelligence Unit, Piamonte was a runner for the Buratong drug group and eventually becoming a pusher for the sydicate,” ani Balba.
Si Piamonte ay kabilang sa drug watch list ng Pasig City Police at isinailalim sa surveillance simula noong Nobyembre 2016.
Kalaunan siya ay naaresto dahil sa ilegal na droga noong Oktubre 16, 2017, ngunit nakalaya nang magpiyansa.
Samantala, isa umanong miyembro ng Buratong drug syndicate ang inaresto sa buy-bust operation ng mga tauhan ng DDEU at District Intelligence Unit (DIU) nitong Hulyo 3.
Inaresto ng mga pulis si Antonio Intalan, 49, ng Bgy. Pineda, Pasig at nasamsam ang P1.25 milyong halaga ng hinihinalang shabu, na may bigat na 190 gramo.
Nakuha mula kina Piamonte at Santos ang 36 na pakete ng hinihinalang shabu, na may bigat na 11 gramo, na tinatayang nagkakahalaga ng P54,560 at ilang drug paraphernalia sa loob ng itim na belt bag.
Kakasuhan ang mga suspek ng paglabag sa RA 9165 (Comprehensive Dangerous Drugs Act of 2002).