Kapag buhay ang inutang

SA paglutang ng malaking bilang ng ating mga kababayan na kumakatig sa muling pagpapatupad ng parusang kamatayan, naniniwala ako na magigising na sa katotohanan ang mga mambabatas upang muling isulong ang Death Penalty Bill. Nangangahulugan lamang na ang pagpapataw ng naturang pinakamabigat na parusa ay isang epektibong hadlang sa karumaldumal na krimen na kaliwa’t kanang nagaganap ngayon sa halos lahat ng sulok ng kapuluan.

Nakapanggagalaiting mabatid na wala nang kinatatakutan ang mga kriminal -- ang mga kampon ni Satanas -- sa pananampalasan sa kahit sinong humahara-hara sa kanilang landas. Ang mga sugapa sa bawal na droga, halimbawa, ay basta na lamang pumapatay lalo na kung sila ay nasa sukdulan ng pagkalango. Wala na silang pinipiling mga biktima -- ginagahasa ang kanilang sariling laman, pinapaslang kahit na ang kanilang mga magulang at mga kapatid. Sila ang kinakasangkapan ng mga druglords sa pagbebenta ng illegal drugs na lumalason sa mga kabataan at sa komunidad.

Karamihan sa mga lulong sa droga at mismong mga pusher ay kabilang sa mga hired killers na sinasabing pasimuno sa pagpaslang sa mga pulitiko, sa malaking negosyante at maging sa kanilang mga kaagaw sa pagbebenta at pamamahagi ng bawal na droga. Hindi ba karapat-dapat lamang ang death penalty sa naturang mga kriminal?

Matagal nang umiiral ang death penalty na napatunayang mabisang balakid sa kahindik-hindik na krimen, lalo na sa paggamit at pagbebenta ng droga. Paulit-ulit na nating binabanggit ang pagpatay sa pamamagitan ng firing squad kay Lim Seng, ang dayuhang druglord. Hindi rin malilimutan ang mga gumahasa sa isang sikat na aktres na binitay sa pamamagitan ng electric chair. Pinatay naman sa pamamagitan ng lethal injection ang ilang salarin na napatunayang gumahasa sa kanilang sariling anak.

Mula nang ipatupad ang naturang mabigat na parusa, kapuna-puna ang biglang pagdalang -- at ganap na pagkawala -- ng mga rapist, druglords at iba pang kriminal. Nakadidismaya na muling naglipana ang mga kampon ng kadiliman nang alisin ang death penalty. Bunsod ito ng kahilingan ng Simbahang Katoliko na laging naninindigan na Diyos lamang ang may kapangyarihang bumawi sa buhay ng Kanyang mga nilikha.

Sa kabila ng gayong paniniwala, natitiyak ko na higit na nakararaming mamamayan ang naghahangad na ibalik ang death penalty bilang hadlang sa nakakikilabot na krimen. Kamatayan lamang ang dapat ihatol sa mga salarin kapag buhay ang kanilang inutang.