R27-R35 umento sa Northern Mindanao

Para sa mga minimum wage earners sa Northern Mindanao, markahan na ninyo ang Nobyembre 1 sa inyong kalendaryo dahil sa araw na ito ipatutupad ang inyong dagdagsahod.

Base sa Wage Order No. RX-20, inaprubahan ng Regional Tripartite Wages and Productivity Board (RTWPB) - Region X ang dagdag sahod na nasa P27.

Sa kabilang dako, ang P35 daily basic wage increase ay ipatutupad sa munisipalidad ng Lugait matapos na ma-reclassified mula Wage Category III at naging II.

Sa bayan ng Balingasag, ang P34 daily basic wage increase ay inaprubahan dahil sa reclassification mula Wage Category IV at naging III.

Ito ay nangangahulugan na ang lugar na sakop ng Wage Category I, partikular na ang Cagayan de Oro at Iligan City, at Tagoloan, Villanueva at Jasaan, ay tatanggap ng P365 para sa non-agricultural at P353 sa agricultural.

Samantala, sa mga manggagawa sa Wage Category II ay tatanggap ng P358 para sa non-agricultural at P346 sa agricultural.

Habang ang mga lugar na kabilang sa Wage Category II ay ang Malaybalay, Valencia, Gingoog, El Salvador at Ozamiz City, at ng Opol, Maramag, Quezon, Manolo Fortich, at Lugait.

Samantala, ang mga lugar na nasa Wage Category III ay tatanggap ng P350 para sa non-agricultural at P338 sa agricultural.

Kabilang sa Wage Category III ay ang Oroquieta at Tangub City at Laguindingan, Mambajao, at Balingasag.

Nakatakda namang tumanggap ang Wage Category IV ng P343 para sa nonagricultural at P331 sa agricultural.

At ang mga nasa Wage Category IV ay ang lahat ng lugar na hindi sakop ng mga naunang nabanggit; at ang lahat ng retail and service establishments na may 10 manggagawa.