Parking fee sa malls, itakda
Nais ni Senator JV Ejercito na magkaroon ng itinakdang singil sa parking ang mga shopping mall sa bansa, upang maiwasan ang pananamantala ng malalaking negosyante.
Sinabi ni Ejercito na sa ngayon ay nasa P30-P50 ang singil sa unang tatlong oras ng parking, at P10 pataas sa mga susunod na oras, habang ang iba naman ay P100 kaagad ang sinisingil sa unang tatlong oras ng parking.
Sinabi ni Ejercito na sa ganitong sitwasyon ay malinaw na walang sinusunod na batas ang mga mall owners.
“The cry from the public against the prevalent practice of charging parking fees by shopping malls and commercial establishments is resounding. Owners of malls and commercial establishments should then give consideration to the buying public,” sabi ni Ejercito.
Sa panukala ng senador, nais niyang itakda sa P40 ang singil sa walong oras na parking ng bawat isang sasakyan, at saka sisingil ng karagdagang P10 sa bawat susunod na oras, habang P100 naman ang singilin sa overnight parking.
Magkakaroon din ng 30 minutong palugit na hindi papatawan ng anumang singil ang customer, at mismong ang mga establisimyento ang mag-iisyu ng resibo.
Pananagutan din ng mga establisimyento kung may mawala sa sasakyan o masira ang sasakyan habang nasa parking area nito.
“Any person or owner of shopping malls, hotels, and similar commercial establishments, his agents and/or authorized representatives who violates the provisions of the measure shall pay a fine of P100,000 per customer charged with an overpriced parking fee and the suspension and/or revocation of their license to operate, upon the discretion of the court,” saad pa sa panukala ni Ejercito.