’Trapo, may dynasty, huwag iboto’
Pinaalalahanan kahapon ng isang Catholic bishop ang mga botante na hindi sapat na batayan sa pagpili ng iboboto ang pagiging “winnable” o ang pangunguna ng kandidato sa mga survey.
Ito ang sinabi ni Manila Auxiliary Bishop Broderick Pabillo, kasunod ng paglalabasan ng mga survey ng mga kandidato sa pagkasenador na may posibilidad na manalo sa halalan sa Mayo 13, 2018.
Ayon kay Pabillo, hindi dapat maging “bulag” ang mga botante at gamitin lang na basehan sa pagpili ng iboboto ang pagiging winnable ng kandidato, batay sa resulta ng survey, o kaya naman ay sa name recall, o sa pamamayagpag nito sa social media.
Nanindigan pa si Pabillo na hindi pagsasayang ng boto ang paghahalal sa kandidatong pinaniniwalaan ng botante, hindi man ito maituturing na winnable.
“Do not join the bandwagon. You are not wasting your vote by voting for one you believe in,” sabi ni Pabillo, chairman ng Commission on the Laity, ng Catholic Bishops’ Conference of the Philippines (CBCP). “By voting for a bad person because he is winnable, you are being an accomplice in destroying our country.” Kasabay nito, pinayuhan ni Pabillo ang mga botante na huwag iboto ang mga itinuturing na “trapo” o traditional politician, gayundin ang mga kabilang sa political dynasty, na dahilan, aniya, ng pagsadsad ng sistema ng pulitika sa bansa.
Aniya, namamayagpag sa pulitika ang ilang angkan, na nagreresulta sa political dynasty, dahil ibinoboto sila ng mga botante.
Hinikayat ni Pabillo ang mga botante na alamin ang background at track record ng mga kandidato at ito ang gawing basehan sa pagboto.