Cavite cop, huli sa pagmamaneho ng carnapped
Isang pulis-Cavite na namataang nagmamaneho ng nakaw na sasakyan at nakuhanan ng ‘di lisensiyadong baril ang inaresto sa Quezon City, nitong Biyernes ng hapon.
Kinilala ni Supt. Giovanni Caliao, commander ng Quezon City Police Station 7, ang inaresto na si PO2 Randy Batonghinog, 34, ng Barangay Socorro sa Cubao, at kasalukuyang nakatalaga sa Cavite Police Station.
Una rito, nakasaad sa police report na isang Maria Gabriella Soler ang nagrenta ng pulang Toyota Innova (A3F234) sa isang car rental establishment sa Cubao, Quezon City noong Hulyo 28, at nakipagkasundo na magbabayad ng P50,000 monthly rental.
Gayunman, bigo si Soler na bayaran ang rental pay para sa Setyembre and hindi na rin matawagan kaya ini-report na ang insidente sa barangay officials at police station.
Samantala, sa ganap na 2:30 ng hapon nitong Biyernes, isang empleyado ng car rental na nakakita sa tinangay na sasakyan sa 13th Avenue sa Bgy. Socorro, Cubao at humingi ng tulong sa PS-7 personnel na agad na rumesponde at tinugis ang suspek.
Nakorner ng mga pulis si Batonghinog sa panulukan ng Gen. Aguinaldo Avenue at Gen. McArthur Avenue sa Araneta Center, at inaresto para imbestigahan.
Ayon kay Batonghinog, hiniram niya ang sasakyan sa kanyang kaibigan na hindi niya pinangalanan.
Nakuha rin sa kanya ang ‘di lisensiyadong Pietro Berretta caliber .32 (DAA5221700) na kargado ng walong bala.
Dinala ang suspek sa AntiCarnapping Section ng QCPD para imbestigahan at kakasuhan ng paglabag sa RA 10883 (Anti-Carnapping Law and Violation) at RA 10591 (Comprehensive Law on Firearms and Ammunition).