Viral: Tumakas sa traffic violation, wanted

Patuloy na inaalam ng Metropolitan Manila Development Authority (MMDA) ang pagkakakilanlan ng bebot na driver na tinakasan ang traffic enforcer na sumita sa kanya dahil sa paglabag sa batas-trapiko.

Ayon kay Celine Pialago, tagapagsalita ng MMDA, posibleng maharap sa patung-patong na traffic violations ang driver ng itim na Toyota Camry (UFQ-883) dahil bukod sa ilegal na pagparada ay tinakasan pa nito ang enforcer nitong Oktubre 19.

Nag-viral sa Facebook ang insidente matapos na i-upload mismo ng enforcer na si Sandy Bilan, nasa hustong gulang, ang video ng pangyayari.

Sa video, mapapanood na sinita ni Bilan ang driver ng naturang sasakyan dahil sa ilegal na pagparada ngunit sa halip na huminto ay pinaharurot pa nito ang sasakyan patungo sa North East Greenhills at tuluyang tumakas.

Ayon pa kay Pialago, ini-report na nila sa Land Transportation Office (LTO) ang nasabing sasakyan upang matukoy ang pagkakilanlan ng driver at lumitaw na nakarehistro ito sa Garment District Incorporated sa Sandoval, Pasig City.

Inirekomenda na rin ng MMDA sa LTO na kanselahin o suspendihin ang lisensiya sa pagmamaneho ng babaeng motorista dahil sa paglabag nito sa batastrapiko at posibleng maharap sa mga kasong illegal parking, obstruction, reckless driving, direct assault, arrogant driving, at disobedience to person in authority.

Bukod dito, may posibilidad na pagmultahin ang driver.