TINABLA SI DIGONG
Guban sa Senado lang muna—Gordon
Tinabla ni Senador Richard Gordon si Pangulong Rodrigo Duterte sa iniutos ng huli na arestuhin ang dating intelligence officer ng Bureau of Customs (BoC) na si Jimmy Guban, makaraang igiit ng senador na dapat na irespeto ang Mataas na Kapulungan bilang co-equal branch ng gobyerno.
Binigyang-diin kahapon ni Gordon, chairman ng Senate Blue Ribbon Committee na nag-iimbestiga sa paglusot ng bilyunbilyong halaga ng shabu sa apat na magnetic lifters, na mananatili si Guban sa kustodiya ng Senado hanggang hindi pa tapos ang pagsisiyasat ng Mataas na Kapulungan.
“I respect the President, but we do follow certain rules, and part of that we must make sure that the status of the Congress as co-equal branch of the government must be respected,” sabi ni Gordon.
Nasa kustodiya ng Senado si Guban matapos na i-cite for contempt ng komite ni Gordon dahil umano sa pagsisinungaling.
Gayunman, nilinaw kahapon ng senador na hindi na nakadetine si Guban sa Senado kundi nasa kustodiya nito bilang mahalagang testigo.
Matatandaang nitong Miyerkules ay inamin ni Guban sa pagdinig sa Kamara na sangkot siya sa pagpupuslit ng nasabing droga, katuwang umano sina dating Philippine Drug Enforcement Agency (PDEA) Deputy Director Ismael Fajardo, at ang nasibak na si Senior Supt. Eduardo Acierto.
Kinumpirma naman kahapon ni Justice Secretary Menardo Guevarra na ililipat si Guban sa kustodiya ng National Bureau of Investigation (NBI) bilang testigo sa usapin—pero iyon ay pagkatapos na makumpleto ng Senado ang imbestigasyon nito.
“Sen. Gordon and I have agreed to transfer custody of a vital witness, Jimmy Guban, to the NBI upon termination of the Senate inquiry,” sabi ni Guevarra. “Mr. Guban shall also be considered for coverage under the Witness Protection Program (WPP), upon full compliance with all the requirements under the WPP law.”