Pagtatampok ng ‘best coco wine’ sa ‘Oktubafest’

MULING itatampok ngayong araw ang ipinagmamalaking coco wine ng Eastern Visayas, sa pagbubukas ng ‘Oktubafest’ sa Tacloban.

Ang piyesta, na lokal na bersiyon ng German beer fiesta na kilala bilang ‘Octoberfest’, ay idaraos sa Astrodome ng lungsod ngayong Oktubre 26.

Sa isang panayam nitong Martes, sinabi ni Waray Partylist Rep. Victoria Noel na ang pagdiriwang ang pinakamalaking pagtitipon ng mga tuba (coconut wine) producer sa buong rehiyon.

Para sa pagdriwang ngayon taon, nahahati ang paligsahan sa tatlong kategorya; ang best “bahal” o old at bahalina o aged; best “kutil” o special wine mixture; at ang best tuba-infused dish cooking for hotels and restaurants.

Para sa bukas na kategorya, magkakaroon ng on-the-spot “kawit” painting, on the spot photo contest, at on the spot Vlogging contest.

Ang “Kawit” ay gawa sa kawayan na ginagamit sa pag-aani o pagkuha ng tuba. Inilalagay ito sa balikat ng aani sa pamamagitan ng kahoy na kawit at nagsisilbing lalagyan ng bagong ani na katas.

Ngayon, sa ikasampung anibersaryo, nangako ang Waray partylist na magapatuloy ang pagdiriwang ng Oktubafest upang maipakita ang suporta sa industriya ng pagniniyog, na pangunahing hanap-buhay ng mga tao sa rehiyon.

“This is synonymous to gaiety and merrymaking and has always been the center of every local festivity, both of the humble and of the grandiose in form,” ani Noel.

Layunin din ng pagdiriwang na maisulong ang kultural na yaman at ang industriya ng pagtutuba sa mga probinsiya ng Leyte at Samar.

Ang tuba ay isang inuming alcohol na nagmumula sa katas ng puno ng niyog. Sa Layte, pinatatagal ang alak hanggang dalawang taon.