Walang droga, walang adik—VP Leni
Iginiit kahapon ni Vice President Leni Robredo na imbestigahan ang pagkakapuslit ng P11 bilyong halaga ng shabu sa bansa, kasunod na rin ng pagkakatunton ng apat na magnetic lifters sa Cavite nitong Agosto.
Ayon kay Robredo, hindi sapat ang ginagawang hakbang ng pamahalaan na sibakin lamang sa posisyon si Isidro Lapeña sa Bureau of Customs (BoC) dahil sa pagkakasalusot ng nasabing droga sa kanilang ahensiya.
Dapat din umanong kasuhan ang mga sangkot sa usapin.
“Ngayong malinaw na nakalusot ang ganito kalaking shipment ng shabu sa BOC, kailangang sundan na ito agad ng malalim at seryosong imbestigasyon nang lahat ng may kinalamang opisyal,” ani Robredo.
Nitong Huwebes, iniutos ni Pangulong Rodrigo Duterte ang paglilipat ni Lapeña sa Technical Education and Skills Development Authority (TESDA) bilang director general.
Si Lapeña ay nakatakdan palitan ng dating opisyal ng militar at dating hepe ng Maritime Industry Authority Administrator (Marina) na si Rey Guerrero.
Dagdag pa ni Robredo, malaking problema sa anti-drug drive ng gobyerno ang pagkakapuslit ng malaking bulto ng droga.
“Kahit gaano pa kabagsik ang pagpapatupad ng ‘war on drugs,’ kung tuloy ang pasok ng shabu sa Pilipinas, lalo na’t kung nailulusot ito sa BOC, hindi matatapos ang problema natin sa droga. Simple lang naman, dapat ang ating susunding polisiya: Kung walang drug supply, walang drug addict. Umaasa tayo na kikilusan agad ng pamahalaan ang isyung ito,” sabi pa nito.