Party-list groups, hiniling isapubliko
Nais ng isang commissioner ng Commission on Elections (Comelec) na maisapubliko ang listahan ng mga nominado ng mga party-list groups na lalahok sa National and Local Elections (NLE), sa Mayo 13, 2019.
Ayon kay Comelec Commissioner Rowena Guanzon, hihilingin niya sa Comelec en banc na ipaskil ang naturang listahan.
Nagpahayag din ng paniniwala ang poll official na karapat-dapat lamang na malaman ng mga mamamayan kung sino ang taong iluluklok nila sa puwesto sa pagboto sa isang party-list group, para na rin sa transparency at accountability ng mga ito.
Matatandaang sa pagboto ay hindi naman ang pangalan ng nominado ng party-list group ang ilalagay sa balota, kundi ang pangalan lamang ng grupong kakatawanin nito.
Karaniwan namang hindi batid ng mga botante kung sino ang kanilang iluluklok, sa gagawin nilang pagboto sa mgaparty-list groups.
“I will ask the @COMELEC En Banc to post the list of nominees of party-list groups,” post ni Guanzon sa kanyang Twitter account.
“Yes the people should know who they are voting for transparency and accountability. Do you agree Comm @ LTFGuia,” aniya pa.
Nasa 185 party-list groups ang naghain ng certificate of nomination noong panahon ng paghahain ng kandidatura para sa 2019 midterm polls, simula Oktubre 11 hanggang Oktubre 17, habang 152 naman ang naghain ng certificate of candidacy para sa pagkasenador.
Samantala, ang opisyal na listahan ng mga kandidatong papayagang tumakbo sa halalan ay nakatakdang ilabas ng Comelec sa Disyembre.