‘Daing festival’ para sa pagsusulong ng kita ng mga mangingisda
INILUNSAD kamakailan ng lokal na pamahalaan ng Noveleta ang unang “Daing (dried fish) Festival” sa baybayin ng seaside El Palacio Hotel, San Rafael IV ng nasabing bayan, para sa hakbang na maiayos at mapaganda ang kabuhayan ng mga mangingisda na magbibigay-daan sa pagkakaroon ng mas malaking kita.
Pinangunahan ni Mayor Dino Reyes Chua, kasama ang mga opisyal ng Barangay San Rafael IV, ang paglulunsad ng unang piyesta ng bayan, kung saan tampok ang iba’t ibang uri ng produktong lamang-dagat sa pangunguna ng daing.
“Atin pong itinatag ang ‘Daing Festival’ upang makilala po ang ating bayan, partikular sa Barangay San Rafael, para po mas maraming tao ang makakilala ng ‘Daing’ products,” pahayag ni Chua sa isang panayam.
Nagsalu-salo ang mayor, mga lokal na opisyal at ang pinuno ng San Rafael Ruth Samartino sa isang boodle fight, tampok ang “daing” at iba pang lamang-dagat bilang kanilang pananghalian.
“Dito po ay pinapakita ng ating barangay San Rafael ang mga produkto na nagagawa nila sa pagdadaing ng mga huli nilang isda dahil karamihan sa kanila ay pagdadaing at pagtutuyo ang ikinabubuhay,” dagdag ni Chua.
Bukod sa kanilang nakasanayang huling isda at sa pakikipagkalakalan sa pamamagitan ng bagong tayong Noveleta Fish Port, na pinondohan ng Bureau of Fisheries and Aquatic Resources, pinagkakaabalahan na rin ngayon ng mga residente sa lugar ang dried fish business—na gumagawa ng mga daing na “lawlaw, “dilis” at ibang uri ng isda upang makatulong na mapalaki ang kanilang kita.
Ayon kay Rommel Atalia, executive assistant ng alkade, ang pagdiriwang nila ng “Daing Festival” ay kasabay ng pista ng kanilang patron na San Rafael Archangel tuwing ika-24 ng Oktubre.