CEBU: R16.4-M SHABU NAKOLEKTA
Nasabat ang may kabuuang P16.4 milyon halaga ng shabu makaraang mahuli ang apat na katao sa magkakahiwalay na anti-drug operation ng Cebu Police Provincial Office (CPPO) kahapon.
Ito ang natanggap na report ni Philippine National Police (PNP) Chief Director General Oscar Albayalde mula ng CPPO, na nagkumpirmang umaabot sa kabuuang P16.4 milyon ang nakumpiskang shabu sa magkakahiwalay na operasyon ng pulisya sa Talisay City at Cebu City nitong Biyernes ng gabi hanggang kahapon ng madaling-araw.
Unang nadakip ang pulisya si Jomari Echaverri Castro, ng Sitio Kalubihan, Barangay Kalunasan, Cebu City, na nasamsaman umano ng 510 gramo ng shabu na nagkakahalaga ng mahigit P6 milyon.
Sinabi ni Chief Insp. Jacky Beribil, ng Guadalupe Police, na ginawa umanong drop off point ang bahay ni Castro sa transaksiyon ng shabu.
Mariin namang itinanggi ni Castro ang mga akusasyon laban sa kanya.
Naaresto naman ang 26-anyos na si Marc Aljer Rabor Romarate, ng Bgy. Pardo, Cebu City kahapon ng madaling araw, makaraang makumpiskahan ng 330 gramo ng shabu, na nagkakahalaga ng P4 milyon.
Ayon kay Chief Insp. Regino Maramag, ng Pardo Police, pagdidistribute lang umano ng shabu ang trabaho ni Romarate, na sinasabing nag-o-operate sa mga kalapit na barangay ng Cebu City.
Nakasamsam din ng aabot sa P6.4-milyon shabu sa magkahiwalay na raid sa Talisay City at Cebu nitong Biyernes ng gabi mula sa isang “Judy”, high-value target, sa Bgy. Mananga, Talisay.
Nakumpiskahan umano si Judy ng aabot sa 300 sachet ng hinihinalang shabu.
Aabot naman sa 26 na gramo ng shabu ang nasamsam mula sa kasabwat umano ni Judy na si Ronie, at inamin umano ng dalawa na nagtutulak sila.
Kaugnay nito, nagsasagawa na ng follow-up operation ang Police Regional Office (PRO)-7 para matukoy kung ang bultu-bulto ng nakumpiskang droga ay bahagi ng nasa P11 bilyon shabu na ipinuslit sa bansa gamit ang apat na magnetic lifter, batay sa imbestigasyon ng Philippine Drug Enforcement Agency, Bureau of Customs, Kamara at Senado.