Suspek sa US mailbomb plot, arestado
Matapos ang limang araw na paghahasik ng takot sa Amerika, isang lalaking may lahing Pilipino ang inaresto dahil sa pinaniniwalaang nasa likod ng pagpapadala ng 14 na pipe bombs sa mga kilalang Demokratikong pulitiko at iba pang kritiko ni US President Donald Trump nitong Biyernes sa Florida, halos isang linggo bago ang nakatakdang midterm election sa US.
Nasa kustodiya na ng federal agents at kinasuhan ng limang federal felonies kabilang ang ‘interstate transportation and illegal mailing of explosives, threatening a former president, making threatening interstate communications and assaulting federal officers,’ si Cesar Sayoc, 56, kilala rin sa tawag na Cesar Altierie, dating stripper at professional wrestler na dati nang may criminal record sa pananakot ng pagbomba sa isang electric company.
Nakuha ng mga awtoridad kay Sayoc ang isang puting van na ginagamit niyang tirahan, na ang mga bintana ay natatakpan ng mga pro-trump stickers, slogan na “CNN sucks” at mga larawan ng mga Democratic leaders na may red target mark sa kanilang mga mukha.
Nitong Huwebes, nasabat ang ilang package na naglalaman ng pipe bomb na nakatakda sanang ipadala sa bahay ng ilang prominenteng kritiko ni US President Donald Trump, kabilang sina US President Barrack Obama, Hillary Clinton, aktor nasi Robert de Niro, California Rep. Maxine Waters, billionaire Democratic donor George Soros, contributor ng Democratic Party Tom Steyer at sa CNN headquarters in Manhattan, New York City.
Sa kanyang personal account sa LinkedIn, nakasaad na may lahing Pilipino si Sayoc dahil lolo umano niya ang isang Colonel Baltazar Zook Sayoc, isang plastic surgeon, na lumaban at nagpatalsik sa mga komunista sa Pilipinas.
Sinasabing Pilipino rin ang ama ng suspek habang ang kanyang ina ay mula Brooklyn, New York City, ayon sa ulat ng AFP.
Nakasaad din sa kanyang LinkedIn account na konektado siya sa Sayoc Kali Martial Arts School na nagtuturo ng Filipino martial arts. Ngunit agad naman itong itinanggi ng Sayoc Kali.
“Sayoc Kali has no knowledge of the person apprehended as part of the investigation into current events. Sayoc Kali condemns in the strongest terms any acts which threaten or inhibit the democratic practices and principles that all Americans and people of free societies hold dear,” pahayag ng Pennsylvania, USA-based martial arts school.
‘EYE-OPENER’
Hindi naman naglalabas pa ng pahayag ang Philippine National Police (PNP) kung nagkaroon na ng koordinasyon sa mga awtoridad ng US para sa beripikasyon ng identidad ni Sayoc.
Gayunman, inamin ni PNP chief, Director General Oscar Albayalde na nagsilbing “eye-opener” ang insidente hindi lamang para sa mga Pilipino kundi sa buong mundo.
“We are actually vulnerable. Remember, the threat on terrorism is already global not only in the US, not only here, it’s global,” aniya.
Aminado rin ang PNP na kulang pa ang bansa sa ‘technologial capabilities’ para rumesponde sa mga katulad na sitwasyon bagamat patuloy umano ang pagpapaunlad ng isang CBRNE unit, isang grupo ng mga eksperto sa chemical, biological, radiological, nuclear at explosives.
“We are currently in the process of developing that unit with the support coming from the different counterparts and little by little, this unit is becoming bigger and our policemen are being trained to respond to such cases,” aniya.
POLITICAL TERRORISM?
Sa kabila ng pagtingin na isang global threat ang terorismo, hindi naman naiisip ni Albayalde na maaaring mangyari ang “political terrorism” sa Pilipinas, lalo na sa nalalapit na 2019 midterm election.
“I think it will not happen here. Hopefully, our candidates will not resort to that. Napakasama naman noon (It is too evil),” giit ni Albayalde.