Palakasin ang ating programa para sa pagpapaunlad ng enerhiya

PINATINDI ng ating problema sa pagtaas ng presyo ng mga bilihin, na ngayo’y pinalala pa ng hindi matiyak na pandaigdigang presyo ng langis, ang pangangailangan ng ating bansa na humanap ng sariling mapagkukunan ng enerhiya.

Masasaksihan natin sa nakatakdang pagbisita ni China President Xi Jinping ngayong Nobyembre ang paglagda sa isang kasunduan para sa joint exploration sa langis sa Reed Bank na bahagi ng South China Sea, na kilala rin sa Recto Bank, na nasa kanluran ng Palawan, isang lugar na kapwa inaangkin ng Pilipinas at China. Sisimulan na sana natin ang drilling operation sa Reed Bank noong 2012 nang mahinto ang lahat.

Ang kasunduang nilagdaan kasama ang isang kumpanya mula Israel na Ratio Petroleum, Ltd., nitong nakaraang linggo ay hindi naman magkakaroon ng problema para sa hurisdiksyon. Hahanap ng langis ang Israeli firm sa lugar na nasa hilagang silangang bahagi ng Palawan, sakop ng malawak na dagat na nagtatapos sa hilagang bahagi ng Mindoro, na nasa silangan ng mga isla ng Visayas, sa timog silangan ng Mindanao at Sulu, sa timog kanluran ng Borneo at nasa kanluran ng Palawan.

Sasaliksikin ng Ratio Petroluem ang East Palawan Basin, sa Area 4 na sumasakop ng 416,000 ektarya sa loob ng susunod na pitong taon, na inaasahang gugugol ng nasa $34,350,000 para sa pag-aaral, pangangalap ng datos, at pagbabarena sa lugar. May iba pang nakatakdang operasyon ang kumpanya ng Israel—sa Levant Basin sa silangang bahagi ng Mediterranean Sea, malayo sa baybayin ng Israel, at sa Malta at Gayuna.

Mayroong hindi mahigit 14 na lugar sa bansa ang pinaniniwalaang may deposito ng langis—isa sa Cagayan Basin, apat sa sa Kanlurang bahagi ng Luzon, dalawa sa AgusanDavao, isa sa Cotobato, tatlo sa Sulu at tatlo sa Palawan. Ang Area 4 na nakatakdang galugarin ng Ratio Petroluem ang isa sa tatlong lugar sa Palawan.

Sa ginanap na seremonya ng paglagda sa Malacañang, sinabi ni Energy Secretary Alfonso Cusi na ipinagdiinan ni Pangulong Duterte ang pangangailangan ng bansa na maisulong ang pagpapaunlad nito ng sariling pagkukunan ng enerhiya, lalo na ngayon na nakikita natin na ang pagdepende natin sa pag-aangkat ay nag-iwan sa atin na maging kaawa-awa sa walang katiyakang paggalaw ng pandaigdigang presyo ng langis sa merkado.

Inaangkat ng Pilipinas ang 94 porsiyentong kailangan nitong langis sa halagang umaabot ng $9.89 bilyon noong 2017. Nasa 31% itong mas mataas sa $7.54 bilyong binayaran natin para sa kinailangan nating langis noong 2016. At maaari na nating asahan ang higit pang paglaki sa mga susunod na taon.

Kinakailangan na natin palakasin at palawigin ang ating programa para sa pagpapaunlad ng enerhiya. Matagal na tayong nakikinabang sa Malampaya natural gas field. Marami na rin tayong nakaabang na mga renewable energy project—geothermal, solar, wind, biomass, at iba pa. Ngayo’y kailangan na nating palakasin ang ating pagsisikap na mapaunlad ang iba’t ibang bahagi ng bansa, tulad ng Palawan, kung saan nakumpirma sa paunang exploratory tests ang posibilidad ng pagkakaroon ng deposito ng langis.