Lakbay-Alalay sa Rizal 2018
ANG Todos los Santos o “All Saints’ Day” batay sa liturgical calendar ng Simbahan ay pandaigdigang pagdiriwang at pagpaparangal ng mga Kristiyanong Katoliko sa lahat ng taong naging mga martir at banal sa ngalan ni Kristo. Kasama na rito ang mga hindi nabigyan ng pangalan.
Ang Todos los Santos ay isang araw din ng paggunita sa lahat ng mabuting tao na naunang nabuhay sa atin na namayapa na. At pagsapit naman ng Nobyembre 2, ginugunita ng Simbahan ang “All Souls’Day” o Araw ng mga Kaluluwa.
Sa iniibig nating Pilipinas, ang Todos los Santos at ang “All Souls’ Day ay iniiukol sa paggunita sa mga yumao nating mga mahal sa buhay, mga kamag-anak, kaibigan at iba pang pinagkakautangan ng loob.
Tuwing All Souls’ Day, ang mga Kristiyano sa iba’t ibang bahagi ng bansa ay dadalaw o pupunta sa mga sementeryo, memorial park at columbarium. Aalayan nila ng panalangin, bulaklak at magtitirik ng mga kandila sa paanan o ibabaw ng puntod ng mga namayapang mahal sa buhay at kamag-anak. Ang paggunita at tradisyong ito ay mahalaga at makahulugan sapagkat bahagi na ito ng kultura nating mga Pilipino--ang paniniwala sa kabilang buhay.
Tuwing sasapit o bago sumapit ang Todos los Santos at All Souls’ Day, isa nang tradisyon at bilang bahagi ng paglilingkod sa ating mga kababayan, may inihanda at inilunsad na gawain ang Department of Public Works and Highways (DPWH) Rizal Engineering District I at Rizal Engineering District II. Ito ay ang Lakbay-Alalay o motorist asssistance. Ito ay pagtulong sa ating mga kababayan na magsisiuwi sa kani-kanilang mga bayan o lalawigan, sakalaing magkakaroon ng aberya sa pag-uwi.
Ayon kay District Engineer Nestor Cleopas, ng Rizal Engineering District I, ang Lakbay-Alalay 2018 sa Rizal ay sisimulan sa umaga ng Oktubre 31, 2018. Matatapos ito sa tanghali ng Nobyembre 5, 2018.
Sa pagpapatupad ng LakbayAlalay, may mga tauhan ang Rizal Engineering District I na maglilibot sa mga pangunahing lansangan ng unang distrito ng Rizal. Ang nasabing mga tauhan ang tutulong sa mga magkakaroon ng problema sa paglalakbay.
Ang pinaka-station sa unang distrito ng Rizal ay nasa Manila East road sa Binangonan. Dalawang grupo ng Rizal Engineering District I 2 ang naka-duty nang 24 oras. Tig-12 oras ang kanilang trabaho. May dump truck at service vehicle na nakaantabay. Oras-oras ay may maglilibot na mga tauhan ng Rizal Engineering District upang malaman ang kalagayan sa mga lansangan.
Ayon naman kay District Engineer Boying Rosete, ng Rizal Engineering District II, ang pinaka-station ng LakbayAlalay 2018 sa ikalawang distrito ng Rizal ay sa Sakbat road sa Morong, Rizal. May nakaantabay na service vehicle, dump truck at pay loader doon.
Hinati sa tatlong shift ang duty ng mga tauhan ng Rizal Engineering District II. Ang unang shift ay mula 6:00 ng umaga hanggang 2:00 ng hapon. Ang ikalawa ay mula naman 2:00 ng hapon hanggang 10:00 ng gabi at ang ikatlong shift ay mula 10:00 ng gabi hanggang 6:00 ng umaga.
Ang Lakbay-Alalay 2018 sa Rizal na ilulunsad ng Rizal Engineering District I at ng Rizal Engineering District II ay alinsunod sa utos ni Regional Director Samson Hebra, ng DPWH Region IV-A Calabarzon na binubuo ng Cavite, Laguna, Batangas, Rizal, at Quezon.