Salita ng taon: Tokhang
Ang “Tokhang” ang napiling 2018 Salita ng Taon sa Sawikaan 2018: Pambansang Kumperensiya sa Salita ng Taon, na idinaos nitong Biyernes sa University of the Philippines (UP) sa Diliman, Quezon City.
Ang nasabing salita ay nominated ng gurong si Mark Angeles.
Ang “Tokhang” ang operasyon ng pulisya kontra ilegal na droga na nangangahulugang kumatok at makiusap.
Gayunman, naging kontrobersiyal ang Oplan Tokhang ng Philippine National Police dahil sa napakaraming napapatay sa mga operasyon ng pulisya, dahil umano sa panlalaban ng mga drug suspect, bukod pa sa mga pamamaslang na sinasabing kagagawan ng mga grupong vigilante.
Pumangalaw ang “Fake news”, habang nasa ikatlong puwesto naman ang “Dengvaxia”.
Ang “Foodie” naman ang tinanghal na “online favorite”, batay sa isinagawang botohan nitong Biyernes ng hapon.
Nominado rin ang mga salitang Dilawan, Federalismo, Quo Warranto, TRAIN, Resibo, DDS, at Troll.
Taun-taong, nagno-nominate ang mga propersor at iskolar ng mga salita o parirala na naging bahagi ng araw-araw na pananalita ng mga Pilipinas sa nakalipas na dalawang taon, at ito ang pinagbobotohan ng panel para piliin ang Salita ng Taon.
Una nang kinilalang Salita ng Taon ang “Canvass” (2004), “Huweteng” (2005), “Lobat” (2006), “Miskol” (2007), “Jejemon” (2010), “Wangwang” (2012), “Selfie” (2014), at “Fotobam” (2016).
Ang Sawikaan 2018 ay inorganisa ng Filipinas Institute of Translation, Komisyon sa Wikang Filipino, at UP-Diliman.