Biyahe ng LRT-2 naging limitado
Nagpatupad kahapon ng limitadong biyahe ang Light Rail Transit Line 2 (LRT-2).
Sa abiso ng LRT Authority (LRTA) sa kanilang Twitter account, nabatid na dakong 8:28 ng umaga nang ipatupad ang limitadong biyahe mula Santolan Station sa Pasig City hanggang V. Mapa Station sa Sta. Mesa, Manila lamang at pabalik, habang wala munang biyahe mula sa V. Mapa Station patungong Recto Avenue at pabalik.
Hindi malinaw kung ano ang dahilan ng provisional service ng LRT-2. Bumalik sa normal ang serbisyo ng tren ganap na 8:51 ng umaga. Humingi ng paumanhin ang LRTA sa naganap na aberya. “Full service resumed at 8:51 a.m. Some services may still be subject to delays. Thank you for bearing with us,” anang LRTA.
Hiniliing ni Senador Nancy Binay na agad aksyunan ang kanyang panukala na itaas ang age of consent ng kabataan mula sa 12-anyos at gawing 16-anyos kasunod ng panggagahasa ng isang pulis sa isang 15-anyos na dalagita.
Noong Hulyo, ikinasa ni Binay ang Senate Bill No 1859 para itaas sa 16-anyos mula sa kasalukuyang 12-anyos ang age of consent sa statutory rape.
“Our anti-rape law says it will only be considered statutory rape if the child is below 12 years old or is mentally challenged. Bilang mga magulang, it is our commitment to protect our children from sexual predators,” ani Binay.
Batay sa ulat, ginahasa ang dalagita kapalit ang kalayaan ng kanyang magulang na nahuli dahil sa droga.
“Magiging liable for statutory rape na ang taong nagkaroon ng sexual relations or intercourse sa isang menor na below 16 years old kung itataas natin ang age of consent,” ani Binay.
Sarado ang tanggapan ng United States (US) Embassy sa Pilipinas at affiliated offices nito sa Nobyembre 1, bilang pakikiisa sa paggunita ng mga Pilipino sa All Saints’ Day, na isang special non-working holiday sa bansa.
Sa isang abiso ng embahada kahapon, suspendido ang lahat ng serbisyo publiko nito sa nasabing araw.
Muling magbubukas ang kanilang tanggapan sa Nobyembre 2, All Soul’s Day.
Ipinasa ng Kamara ang House Bill 8217 na magtatatag sa sistema na tinatawag na Consolidated Poverty Data Collection (CPDC) upang matukoy ang mga benepisaryo at masiguro ang kanilang proteksiyon, kagalingan at kabutihan.
Inakda ni Rep. Jose Enrique Garcia III (2nd District, Bataan), itinatadhana ang paggamit ng CPDC system alinsunod sa polisiya ng Estado na mapalaya ang mga tao mula sa kahirapan sa pamamagitan ng mga patakaran na magkakaloob ng sapat na social services, magandang pamumuhay, trabaho at kaginhawahan.
Ang CPDC system ay tumutukoy sa “generation of data at the local level which serves as basis in targeting poor households in the planning, budgeting and implementation of government programs geared towards poverty alleviation.”