Diesel sa gasolinahan, tumagas
Mahigpit na binabantayan ng Makati City Fire Department ang pagtagas ng diesel fuel sa isang gasolinahan sa lungsod, kamakalawa ng hapon.
Muling nagsagawa kahapon ng flushing ang mga bumbero, upang mabawasan ang masangsang na amoy o fumes mula sa pansamantalang isinara na Phoenix Petroleum gas station na matatagpuan sa panulukan ng Evangelista at Estrella Streets, Barangay Bangkal sa Makati City, bandang 4:00 ng hapon nitong Huwebes.
Ayon kay Makati Vice-Mayor Monique Lagdameo, nitong Miyerkules pa inirereklamo ng mga residente ang masangsang na amoy o gasoline leak sa kanal ng Estrella St., na nagmula sa naturang gas station.
Dahil dito, mabilis na rumesponde ang mga bumbero, sa pangunguna ni Fire Supt. Quisto, at agad na kinordonan ang lugar para sa kaligtasan ng publiko at pansamantalang isinara ang paligid ng gasolinahan upang matukoy ang leak at iba pang apektadong lugar.
Binuksan ng mga bumbero ang mga apektadong kanal at gumamit ng gas detector upang masuri ang kontaminasyon hanggang sa madiskubreng diesel fuel ito.
Nag-spray ng tubig sa lugar upang maalis ang tumagas na diesel.
Pansamantala ring isinara sa trapiko ang Evangelista St., gayundin Luna St., hanggang Macabulos Street.
Dumating naman ang Phoneix tanker upang sipsipin ang natitirang gasoline products na nakaimbak sa storage tank ng nasabing gasoline station, bandang 5:30 ng hapon.
Pinayuhan naman ni Makati City Police chief, Senior Supt. Rogelio Simon ang publiko na iwasang manigarilyo malapit sa lugar at gumamit ng appliances upang maiwasan ang anumang friction na posibleng magdulot ng pagsabog o sunog.