Halimbawa ng sinseridad at kredibilidad ang kailangan

ISINAILALIM ni Pangulong Duterte ang Bureau of Customs (BoC) sa militar. Lawlessness ang kanyang batayan, ayon

kay Presidential Spokesperson Salvador Panelo. Ang kurapsiyon na dahilan ng paglabas ng napakalaking shipment ng shabu, na nagkakahalaga ng P11 bilyon, sa BoC ay lawlessness na matatawag, aniya.

Pero, ayon kay Sen. Ping Lacson, hindi garantiya na hindi mangyayaring muli ang nangyari sa panahon ni dating Pangulong Marcos, pero taliwas ito. “Totoo, wika niya, na nabigo ang mga sindikato na masilaw nila ng salapi ang mga sundalo, pero nang bigyan na sila ng mga batang babae, nagtagumpay ang mga ito at ang sumunod ay bahagi na ng kasaysayan,” paliwanag ng senador.

Ang remedyong iminungkahi naman ni Romy Macalintal, kandidato opisyal ng oposisyon para senador, ay si Pangulong Duterte mismo ang mamuno ng BoC. Kapag nagpatuloy umano ang

anomalya sa kabila nito, huwag na tayong umasa pa na may pagbabagong mangyayari rito.

Hindi naman kailangan na ang Pangulo mismo ang mamumuno at mamahala sa BoC. Ang kailangan ay mapapagkatiwalaan na susunod sa kanya. Kung laban siya sa droga at kurapsiyon, bakit hindi siya igagalang at susundin? Madaling magpasunod kung ang sinasabi mo ay ginagawa mo. Pero, hindi ito ang halimbawa na nakikita ng mga tagasunod sa kanilang dapat sundin. Wala silang nakikita o nadarama na sinseridad at kredibilidad ng mga namumuno sa kanilang ipinaglalaban at itinataguyod na prinsipyo at polisiya.

Ang magkasunod na BoC commissioner ay sina Nicanor Faeldon at Isidro Lapeña na parehong mga sundalo. Pero, sa ilalim ng kanilang pamamahala

nakalusot ang naglalakihang shipment ng shabu.

Sa panahon ni Faeldon, 6.4 bilyong halaga ng shabu ang nakalusot sa BoC at natunton sa warehouse sa Valenzuela. Inihabla ang mga taga-Customs at whistle blower na si Taguba at may-ari ng warehouse. Ang lahat ng kasong isinampa sa mga korte ng Valenzuela ay ibinasura batay lang sa teknikalidad. Ang naiwang nakademanda ay ang impleyado ng warehouse.

Samantalang si Faeldon, tinanggal nga sa BoC, pero hinirang naman ng Pangulo noong una sa Office of Civil Defense, at ngayon sa Bureau of Corrections. Sa napakalaking shipment ng shabu, na nagkakahalaga ng P11 bilyon, sa pamumuno naman ni Lapeña nangyari. Ipinaaresto ni Pangulong Digong si whistle blower Jimmy

Guban, pero ngayon ay nasa ilalim na ng Witness Protection Program. Wala pang nasasampahan ng kaso sa P11 bilyong shabu na ang mga pinalagyang magnetic lifters ay nahanap sa GMA, Cavite. Samantala, inalis nga si Lapeña sa BoC, pero ginawa naman siyang TESDA director at miyembro ng Gabinete.

Nasa labas nang lahat ang shabu na naipuslit sa pantalan. Naikalat na ang mga ito ng mga taong nangangalakal ng ilegal na droga. Pero, sa pagpapairal ng war on drugs ng Pangulo, ang nasasabat at napapatay sa engkuwentro ay mga dukha. Kaya kahit sino ang ilagay sa BoC, kung ganito naman pairalin at itaguyod ang mga polisiya laban sa kurapsiyon at ilegal na droga, manalangin na lang tayo na abutin ng suntok ang buwan.