‘Ping-Pong Diplomacy’ para sa atletang Pinoy
BEIJING, China – Bagong yugto sa ugnayang Pilipinas at China sa pamamagitan ng sports.
Binigyan ng bagong kahulugan ng Table Tennis Association for National Development (TATAND), sa pakikipagtulungan ng Uni-Orient Travel Inc., ang pamosong ‘Ping-Pong Diplomacy’ sa inilargang Youth Table Tennis Exchange sa Capital University of Physical Education and Sports dito.
Kabuuang 60 miyembro ang delegasyon ng Pilipinas, kabilang ang coach, technical officials at atleta, sa pangunguna nina UAAP two-time MVP Emy Rose Dael ng La Salle at 11-year old protégé Kaitlyn Cruz ng Paco Integrated School para sa apat na araw na pag-aaral, pagsasanay at pagpapatibay sa ugnayan ng dalawang bansa bilang magkasangga sa grassroots sports development.
“I hope that through non-governmental exchanges, we will do our part for the Philippine-Chinese relationship. When the relationship between the Philippines and China was unstable, the ‘Ping-Pong Diplomacy’ campaign was launched to enable Filipino-Chinese youth to compete on the same stage and come to Beijing to learn about the Chinese culture. The friendship of the youth is like extending an arm for the Filipino-Chinese friendship,” pahayag ni Mr. Stephen Techico, honorary president, Federation of Filipino Chinese Association of the Philippines.
“Table Tennis is the national sport of China. China is also the sacred land for the sports every country looks up to for studies. We hope that the young athletes in the Philippines can learn and progress better and spread the sport of table tennis,”
Kasama ang mga opisyal ng TATAND na kinabibilangan nina honorary presidents Philip Uy at Charlie Lim, nakipagpulong si Techico kina China Olympic Committee Vice Chairman Mr. Li Yungchuan, CUPES Principal Mr. Zhong Bingshu at First Secretary and Counsellor of the Philippine Embasy to China Mr. Winston Dean Almeda sa hangaring mas mapalawak ang aspeto ng ugnayan ng dalawang bansa para sa kaunlaran ng sports at makamit ng Pilipino ang kaalaman para mas maging kompetitibo sa international meet.
Nauna rito, nagbigay pugay ang delegasyon kay Philippine Ambassador to China Hon. Chito Sta. Romana sa tanggapan ng Philippine Embassy kung saan ipinahayag ng embahada ang pasasalamat sa TATAND sa inilunsad na programa na aniya’y malaking tulong sa pagpupunyagi ng pamahalaan na mapatibay ang magandang relasyon ng dalawang bansa.
“Ikinalulugod namin na bahagi ng inyong programa na mapaigting ang ating ugnayan sa bansang China at makamit ang kaalaman para mapataas ang kalidad ng table tennis sa ating bansa. Ang sports ay nagbibigay ng dangal sa atin bilang Pilipino at malaki ang tsansa natin na maging world class sa sports,” pahayag ni Sta. Romana.
Sa unang pagkakataon, nakalaro sa Olympics noong 2016 Rio de Janiero, Brazil si table tennis star Yan-Yan Lariba matapos magkwalipika sa nakamit na ranking points sa international competition. Ngunit, matapos ang quadrennial meet, nadiagnose ang kanyang sakit na leukemia at nitong taon ay pumanaw ang 24-anyos na atleta.
‘Idol ko po si Yan-Yan. Gusto ko pong matuto talaga at mapataas ang level ng aking laro para magaya ko siya at makalaro din ako sa Olympics, pahayag ni Kaitlyn, ang pinakabata sa delegasyon sa edad na 11-anyos.
Iginiit ni Techico na ipagkakaloob niya ang nararapat na suporta at sa tulong ng mga kasangga sa CUPES para maabot ng mga atletang Pinoy na pangarap na magtagumpay sa table tennis.
“We’re planning to hold more local tournaments and sports exchange in other university in China. Our athletes need proper training and exposure in tournament abroad,” sambit ni Techico.