Guerrero sa BoC: Lahat dapat dokumentado

Nagbabala kahapon si bagong Customs Commissioner Rey Guerrero na gagamitin niya ang lahat ng kanyang kapangyarihan upang mabura ang katiwalian sa kagawaran.

Sa pagsisimula ng termino ni Guerrero sa tadtad ng kurapsiyon na Bureau of Customs (BoC), sinabi niya na hindi siya magdadalawang–isip na gamitin lahat ng kanyang kapangyarihan para matamo ang pangunahin niyang prayoridad – ang labanan ang katiwalian at walisin ang mga kurakot na opisyal.

“Hindi ako mangingimi na gamitin ang aking kapangyarihan at otoridad para siguraduhin na ako’y magtagumpay sa aking tungkulin,” ani Guerrero sa gitna ng mga plano na magtalaga ng mga militar para suportahan ang operasyon ng kagawaran.

Nagsalita sa kanyang unang flag raising ceremony sa bureau, hinimok din ni Guerrero ang lahat ng empleyado ng BoC na tulungan siya at pagkatiwalaan sa kanilang misyon na linisin ang kagawaran.

“Ako ay nanawagan sa inyong lahat bilang inyong pinuno na tulungan ninyo ako na ipatupad ang aking tungkulin,” sabi ng commissioner.

“Magtiwala tayo sa isa’t isa at tapat nating gampanan nating ang ating tungkulin bilang mga public servants,” dugtong niya.

Ipinag-utos niya na ang bawat transaksiyon sa loob ng kagawaran ay dapat na dokumentado. “Everything should be documented, reported, and transparent,” aniya.

Nagbabala rin siya na walang sino man ang binigyan niya ng awtorisasyon para gamitin ang kanyang pangalan sa mga ilegal na transaksiyon. Hinimok niya ang lahat na isumbong ang sino mang gagamit ng kanyang pangalan para sa illegal na transaksiyon.

Sinabi rin ng dating AFP chief na ipagpapatuloy niya ang paglansag sa umiiral na “tara” system sa bureau, na sinabi ni dating Customs commissioner Isidro Lapena na kanya nang napurga.