14 na huwaran ng MIAA pinarangalan
Tumanggap ng parangal mula sa Manila International Airport Authority (MIAA) ang 11 airport police, dalawang medical staff at isang miyembro ng Terminal Operations Group (TOG) sa flag raising ceremony sa administration building ng MIAA, kahapon ng umaga.
Iginawad ni MIAA General Manager Ed Monreal ang parangal sa 11 airport police para sa “Outstanding Performance” at “Successful Responsibilities” bunga ng pagkakahuli kay Joseph Pascasio, suspek sa salisi, swindling, at pangongotong sa mga pasahero sa Ninoy Aquino International Airport (NAIA)-Terminal 3 sa Pasay City.
Kinasuhan si Pascasio ng paglabag sa Article 294, robbery extortion, Article 315, at iba pang asunto.
Ang mga pinarangalan ay sina APD Senior Insp. Danilo Inalves, APO2s Nino Calma, Ferdinand Cesar Mandanas, Edwin Mapile, Alvin Patayan, APO1s Joey Barlaan, Jim Allan Alcantara, Efreliza Bugarin, Fernando Panghulan; at Jerico Kim Patriarca.
Inirekomenda namang parangalan si APO3 Amor Andula matapos isauli ang laptop ng asawa ni Miss Asia Margaret Cunanan Insia, sa NAIA T3.
Pinarangalan din ng MIAA ang dalawang medical staff sa pag-assist sa isang buntis na empleyado na dinugo sa NAIA T2 nitong Hulyo.
Si Mr. Arturo Verallo ng TOG ay pinarangalang sa kanyang katapatan matapos isauli ang US$500 na naiwan ng isang dayuhan sa Carousel Area ng NAIA T1, nitong Oktubre 22.