Bebot pinatay para nakawan ng houseboy

Sa kabila ng paglilinis sa pinangyarihan ng krimen sa pagnanais na hindi maaresto, nadakma ng mga pulis ang umano’y drug-crazed houseboy na ninakawan at pinatay ang amo niyang babae sa apartment nito sa Quezon City, nitong nakaraang linggo.

Kinilala ni Quezon City Police District director, Chief Superintendent Joselito Esquivel, Jr. ang suspek na si Donato Dollente, alyas Bong, 51, na iniuugnay sa pagpatay kay Maria Joy Maskariño, 55, certified public accountant.

Ayon sa awtoridad, si Dollente ay houseboy ng pamilya Maskariños sa loob ng 10 taon.

Sa inisyal na imbestigasyon, makailang beses tinawagan si Maskariño ng kapatid, si Edgar at kanyang misis, ngunit hindi sinasagot nitong Sabado, bandang 3:00 ng hapon.

Pagsapit ng 6:00 ng gabi noong araw ding iyon, nagdesisyon ang magasawa na silipin si Maskariño sa kanyang apartment sa Cleofas Street, sa Barangay Pasong Tamo.

Sa kanilang pagpasok sa unit, nakitang nilang duguang nakabulagta ang biktima at agad na ini-report ang insidente sa pulisya.

Sa cursory investigation ng mga pulis, lumalabas na ang biktima ay hinampas ng matigas na bagay sa ulo na naging sanhi ng pagkamatay nito.

Nag-imbestiga ang QCPD-Criminal Investigation and Detection Unit (CIDU) at natagpuan ang isang resibo ng grocery at nabatid na huling nakasama ng biktima si Dollente sa isang grocery store nitong Biyernes, dakong 12:00 ng tanghali.

Nagtungo ang mga pulis sa bahay ni Dollente sa San Ville St., sa Bgy. Culiat at inimbitahan sa CIDU office sa Camp Karingal nitong Linggo, dakong 3:00 ng madaling araw.

Sa interogasyon, inamin ni Dollente na pinatay niya ang biktima sa pamamagitan ng paghahampas ng dumbbells sa ulo nito upang kunin ang kanyang pera at gamit, ngunit ipinaliwanag na siya ay nasa impluwensiya ng droga nang isagawa ang krimen.

Narekober mula sa suspek ang ninakaw nitong laptop, tablet, mobile phone, wristwatch, identification cards, ATM cards, bankbooks at P7,000 cash ng biktima.

Kakasuhan si Dollente ng robbery with homicide.