3 sa drugs watch list, timbog
Arestado ang tatlong lalaki, na kabilang sa drugs watch list ng Makati City Police, sa buy-bust operation sa lungsod, kamakalawa ng gabi.
Kinilala ni Senior Supt. Rogelio Simon, hepe ng pulisya, ang mga naaresto na sina Junbel Golez y Gregorio, 34, Grab driver, ng Bagong Silang Street, Barangay Pinagbuhatan, Pasig City; Homer Kalaw y Guevarra, 47, ng Jerboys St., Bgy. Guadalupe Nuevo, Makati City; at Larry Johnson y Bañaga, 49, ng 105 Road Valley Gold Subdivision, Cainta, Rizal.
Sa ulat, nagsagawa ng buy-bust operation ang mga tauhan ng Station Drugs Enforcement unit (SDEU) laban kina alyas Junbel at Homer sa No. 2782 Ensuenio St., Bgy Pinagkaisahan, Guadalupe, sa Makati City, dakong 6:15 ng gabi.
Unang nakatanggap ng text message ang Makati PNP mula sa Team NCRPO kaugnay ng talamak na aktibidad sa ilegal na droga sa Guadalupe, partikular sa mga jeepney terminal sa Pinagkaisahan sa lungsod, kaya nagkasa ng operasyon ang SDEU.
Isang pulis ang nagsilbing poseurbuyer at bumili ng P500 halaga ng droga sa mga suspek na sanhi ng kanilang pagkakaaresto.
Nakumpiska kina Golez, Kalaw at Johnson ang 11 pakete ng umano’y shabu, drug paraphernalia at limang piraso ng P100 bills na buy-bust money.
Sa imbestigasyon, unang naaresto ang suspek na si Golez at sinampahan ng kasong possession of illegal drugs sa Makati Prosecutor’s Office, subalit nakapagpiyansa.
Samantalang sina Kalaw at Johnson ay nagsu-supply umano ng droga sa jeepney terminals sa Guadalupe.
Naghihimas ng rehas ang mga suspek at isasailalim sa inquest proceedings para sa kasong paglabag sa Sections 5, 13 at 14 ng Comprehensive Dangerous Drugs Act of 2002 (RA 9165).