Deployment ban sa UAE, muntikan na
Magpapatupad sana ng deployment ban sa mga manggagawang Pinoy sa United Arab Emirates (UAE) kung natuloy ang pagbitay sa overseas Filipino worker (OFW) na si Jennifer Dalquez.
Ito ang pinanindigan ni Pangulong Duterte matapos niyang magpatawag ng pulong sa kanyang Gabinete nitong Martes.
Nailigtas si Dalquez sa parusang bitay nang mapawalang-sala sa pagpatay sa kanyang amo, at nakauwi na sa bansa nitong Nobyembre 2 matapos ang apat na taong pagkakakulong.
Naging emosyonal din si Dalquez nang makadaupang-palad si Pangulong Duterte nitong Martes.
“Kaka-release lang nung babae doon sa—(taga-)Maguindanao ‘yun. She’s a Maguindanao lady. Before coming here, nag-usap kami kasi she was spared,” ayon sa Pangulo.
“Sabi ko kasi, ‘P ******* i** bitayin ninyo ‘yan,’ sabihin ko sa inyo, I will immediately order the suspension of the employment,” anang Presidente.
Hiniling na rin ng Pangulo kay Labor Secretary Silvestre Bello III, na nasa pulong, na ipaalam sa publiko ang naging kaso ni Dalquez.
Inamin naman ni Bello na nais ng Punong Ehekutibo na tuluyang magpatupad ng total deoployment kung bibitayin si Dalquez.
Ayon sa kalihim, nagtungo na sila ni Philippine Overseas Employment Administration Head Hans Leo Cacdac sa Abu Dhabi upang ipabatid ang sentimyento ng Pangulo.
“I said, ‘the President respect your justice system but the President feels that if you hang his countrymen, then he just to declare a total deployment ban for the entire United Arab Emirates,’” ani Bello.