Ahtisa Manalo, 1st runner-up sa Miss Int’l
FIRST runner up ang pambato nating si Ma. Ahtisa Manalo
sa Miss International 2018 beauty pageant sa Tokyo, Japan, nitong Biyernes ng hapon.
Ito ang unang pagkakataon na pumuwesto ang Pilipinas nang first runner-up sa 58-anyos na beauty contest, na anim na beses nang napanalunan ng mga Pilipina.
Si Mariem Velazco ng Venezuela ang kinoronahang Miss International 2018. Kandidata naman mula sa South Africa ang 2nd runner-up, nagmula sa Romania ang 3rd runner-up, at pambato ng Colombia ang 4th runner-up.
Sa kanyang speech, sinabi ni Ahtisa: “If I will be lucky enough to be chosen as Miss International 2018, I will continue to be the voice of the youth and let them know that nothing is impossible with hard work and determination.”
Nauna rito, nagwala ang mga Pinoy pageant fans nang mapasama si Ahtisa sa Top 15 ng patimpalak, kaya naman isa ang Miss International show sa mga trending topics sa social media nitong Biyernes ng hapon.
Todo rin ang cheer ng mga tagasuporta ng 21-anyos na beauty queen nang rumampa siya suot ang national costume, swimsuit, at evening gown.
Pasok din sa Top 15, mula sa 77 kandidata, ang nagmula sa Mexico, Ecuador, Thailand, Australia, Paraguay, Japan, Indonesia, Ukraine, Spain, at Madagascar. Mula sa Top 15 candidates, pinili ang Top 8 na kinabibilangan ng mga pambato ng Japan, Romania, Ecuador, Colombia, Spain, South Africa, Venezuela, at Pilipinas.
Anim nang Pinay ang kinoronahang Miss International: sina Gemma Cruz (1964), Aurora
Pijuan (1970), Melanie Marquez (1979), Precious Lara Quigaman (2005), Bea Rose Santiago (2013), at Kylie Verzosa (2016). Fan ng crime-busting television series na Charlie’s Angels, sinabi ni Ahtisa na nais niyang maging pulis noong bata pa siya, pero hindi pabor dito ang kanyang mga magulang.
Sa halip, tinapos niya ang degree in accountancy sa Manuel S. Enverga University sa Candelaria, Quezon. Taong 2016 naman nang nanalo siya bilang Binibining Niyogyugan.