Digong sa WPS oil share: Mas malaki sa ‘min
Igigiit ni Pangulong Rodrigo Duterte sa China na dapat ay mabigyan ang Pilipinas ng mas malaking bahagi sa magiging kita nito mula sa makukuhang langis sa isasagawang joint exploration ng dalawang bansa sa West Philippines Sea (WPS) o South China Sea.
Ito ang inihayag ng Pangulo nang dumalo sa “Subaraw Biodiversity Festival” ng Palawan sa Puerto Princesa City nitong Sabado ng gabi.
Kailangan, aniya, ng Pilipinas ang langis upang mapailawan ang mga lugar sa bansa na hindi pa nararating ng elektrisidad.
“‘Yang oil sinabi ko sa China, kung meron man at kayo ‘yung magdi-drill d’yan ng oil, sabi ko ‘I will have to insist on mas malaki ‘yung amin. Amin ‘yan, eh,” sabi ni Duterte.
“Alam mo bakit? Kailangan ko ‘yung pera, kasi ‘yung inyong sitwasyon dito (Palawan), ‘yung inyong ilaw dito. At this late of the day of development in the country, may brownout kayo na six to eight hours. That is not acceptable to me,” aniya.
Marso ngayong taon nang tinukoy ng Malacañang ang Service Contract (SC) 57 at SC 72 sa pagsasagawa ng joint exploration.
Matatandaang sinabi ni dating Presidential Spokesman Harry Roque na kinakailangang sumunod ng China sa domestic law ng bansa, dahil ang Pilipinas ang nakasasakop ng SC 57.
“They will absolutely be subject to Philippine laws if it is [SC] 57. It would have to be the mining code. The domestic law of the Philippines will prevail over [SC] 57,” pahayag ng Malacañang.
Alinsunod sa Philippine National Oil Company (PNOC), ang SC 57
ay ini-award sa PNOC Exploration Corporation (EC) noong Setyembre 15, 2005.
Sinasaklaw nito ang kabuuang 7,120 square kilometer sa baybayin ng Northwest Palawan at ito matatagpuan sa tinatayang 50 kilometro sa hilagang-kanluran ng north-westernmost tip ng Busuanga Island.
Nauna nang nilinaw ng Malakanyang na wala namang magiging problema kung pahihintulutan ng Pilipinas ang China na maki-joint explore at magamit ang lugar na nasasaklawan ng EEZ dahil hawak pa rin ng bansa sovereign decision sa pagsasagawa nito.