Pagtitipid sa ODA loans pinaiimbestigahan
Hinihiling ng isang mambabatas ng oposisyon na imbestigahan ng Kamara ang iniulat ng gobyernong Duterte na mababang paggastos sa Official Development Assistance (ODA) loans noong 2017.
Nagpahayag ng pagkabahala si MAGDALO partylist Rep. Gary Alejano na ang pagkaantala sa paggamit sa ODA loans ay magreresulta sa pagkakaantala ng pagkukumpleto sa 17 proyekto.
Sinabi niya na dapat ipaliwanag ng mga kasapi ng Kamara ang estado ng 17 apektadong proyekto at ang rason sa likod ng pagkaantala.
“This chamber, given the power and prerogative to approve, determine, and allocate the national budget of government must conduct an inquiry, in aid of legislation, to explain the cause of the low spending of the government with regard to the ODA loans leading to the delay in the completion of projects impeding growth and national development,” aniya sa paghahain niya ng House Resolution 2220.
Binanggit niya na kamakaialan ay naalarma ang Commission on Audit (COA) sa mababang paggastos ng gobyernong Duterte sa ODA loans, ibinunyag na P299.75 milyon lamang mula sa P74.55 bilyon inaprubahang loans mula sa foreign lenders ang ginamit ng gobyerno. “The P299.75 million represents only around 0.4 percent of the total net loan commitments received from at least 10 foreign aid loans contracted in 2017.The low spending caused delays in the target date completion of 17 projects,” ani Alejano.
Ayon sa CoA, kabilang sa mga naantalang proyekto ang Capacity Enhancement of Mass Transit Systems in Metro Manila project na tumanggap ng P20.796B mula sa Japan International Cooperation Agency (JICA); ang konstruksiyon ng Light Rail Transit (LRT) Line 1 Cavite Extension at ng LRT Line 2 Masinag Extension; New Bohol Airport Construction and Sustainable Environment Protection Project; Cebu Bus Rapid Transit System; and Philippine Coast Guard (PCG) Capability Development Project, at iba pa.
Ikinalulungkot ni Alejano na bukod sa pagkakaantala ng pagkukumpleto sa mga tinukoy na proyekto, kailangan ding bayaran ng gobyerno ang lenders ng “commitment fees” o penalties na nagkakahalaga ng P230.17M dahil sa “delayed withdrawal or availment of loans.”