Karapatan ng ‘Pinas sa SCS, igigiit sa 33rd ASEAN

SINGAPORE – Muling pagtitibayin ni Pangulong Duterte ang karapatan ng Pilipinas sa pinagaagawang mga isla sa South China Sea, sa 33rd Association of Southeast Asian Nations (ASEAN) dito.

Sa isang pahayag, sinabi ng Malacañang na nakatakdang makipagdayalogo si Duterte, kasama ang siyam na iba pang lider ng ASEAN, sa mga katuwang nitong bansa upang higit na palakasin ang ugnayan sa mga mahahalagang lugar ng kooperasyon.

“The President will reiterate the Philippines’ principled positions on matters concerning the South China Sea and transnational and transboundary issues such as terrorism, violent extremism, trafficking in persons, illicit drugs and disaster risk reduction and management,” pahayag ng Palasyo.

Ayon sa Malacañang, umaasa rin ang Pilipinas sa pakikipagpalitan ng pagtingin sa ASEAN communitybuilding gayundin sa diskusyon sa rehiyunal at global na pagpapaunlad na malaking epekto sa kapayapaan, seguridad, at katatagan ng rehiyon.

Una nang sinabi ng Department of Foreign Affairs (DFA) na isa ang South China Sea sa mga rehiyunal na isyung nakatakdang pag-usapan kasama ng Korean peninsula.

Inaasahan ang pakikipagpulong ng 10 ASEAN lider sa China sa tatlong magkakaugnay na summit, ang ASEAN Plus China Summit, ASEAN Plus Three Summit kasama ang Japan at South Korea, at ang East Asia Summit kasama ng Australia, India, Japan, New Zealand, Republic of Korea, Russia, at United States.

Dumating si Pangulong Duterte sa Singapore nitong Lunes ng gabi, para sa tatlong araw na 33rd ASEAN Summit at sa kaugnay na summit, kabilang ang East Asia Summit.

Nakatakda ring magdaos si Duterte ng ilang bilateral meeting sa hindi pa tiyak na bilang ng mga lider na dadalo sa summit, kabilang si Japanese Prime Minister Shinzo Abe.

Nabanggit naman ni Philippine Ambassador to Singapore Joseph Del Mar Yap na maaaring makadaupang– palad ng Pangulo si Russian President Vladimir Putin at United States Vice President Mike Pence na kumakatawan kay Trump.