MMDA constable, huli sa ‘pangingikil’ ng R20K

Arestado sa extortion ang isang traffic constable ng Metropolitan Manila Development Authority (MMDA) matapos umanong kikilan ng P20,000 ang isang delivery van driver kapalit ng hindi pag-impound ng sasakyan nito na sinasabing colorum sa Quezon City, nitong Miyerkules.

Kinilala ni Supt. Ophelio Concina, Jr., hepe ng Quezon City Police District Project 4 Police Station (PS-8), ang suspek na si Jonel Pollos, 26, MMDA personnel, at residente ng Barangay Batasan Hills, Quezon City.

Bago ang pag-aresto, nagtungo ang complainant na si Mary Joy Labro, 46, sa police station upang i-report si Pollos na umano’y nanghingi ng P20,000 upang hindi ma-impound ang kanyang delivery van.

Sinabi ni case investigator PO3 Juanito Dimaligalig na ayon kay Labro ay inaresto ni Pollos ang kanyang driver na si Roderick Datun sa Katipunan Avenue, dahil ang minamaneho nitong Mitsubishi L300 van na ginagamit sa pagdideliver ay sinasabing colorum noong Nobyembre 13, dakong 11:00 ng gabi.

Sinabihan umano ni Pollos ang driver na kailangan i-impound ang kanyang sasakyan kaya tinawagan ni Datun ang kanyang amo.

Habang nakikipag-usap si Labro sa traffic personnel, humingi na umano ng pera ang huli.

Matapos na mag-usap, nagpasaklolo ang complainant sa mga awtoridad at agad nagsagawa ng entrapment operation laban sa suspek.

Sa ganap na 12:30 ng madaling araw nitong Miyerkules, nakipagkita si Labro kay Pollos sa tapat ng isang supermarket sa P. Tuazon Boulevard kung saan niya inabot ang P1,800 entrapment money, na naging sanhi ng pagkakaaresto ng suspek.

Hawak na ng awtoridad si Pollos habang inihahanda ang kasong robbery extortion laban sa kanya.