‘Pinas at Papua New Guinea, magtutulungan sa agrikultura
PORT MORESBY – Pinagtibay ng Pilipinas at Papua New Guinea ang isang mahalagang kasunduan, na magpapalakas sa kooperasyon ng dalawang bansa sa agrikultural na pagunlad, kabilang ang produksiyon ng bigas, niyog at kape.
Sa pagbisita ni Pangulong Duterte sa Papua New Guinea, nilagdaan nina Agriculture Secretary Emmanuel Piñol at Papua New Guinea Agriculture and Livestock Minister Benny Allan ang Memorandum of Agreement on Agricultural Cooperation na layong “[to] promote mutual consultations, exchanges on technical assistance, and joint research on specific areas of agriculture.”
Sa ilalim ng kasunduan, magtutulungan ang dalawang bansa sa produksiyon ng bigas at trigo, gayundin sa mga industriyal na pananim tulad ng coconut, cocoa, coffee, rubber at palm oil, at horticultural crops at mga pampalasa.
Magtutulungan din ang mga bansa sa aquaculture at inland fish farming; postharvest development; livestock breeding; pagsasanay sa bio-security mechanisms and systems for monitoring; pagpapaunlad ng agri-businesses at technical training para sa pagtatayo ng mga agri-business resource centers.
Magiging magkatuwang din ang Pilipinas at Papua New Guinea sa pagtatayo ng mga irigasyon para sa malakihang produksiyon ng bigas, renovation at pagtatayo ng mga slaughterhouse, gayundin sa pananaliksik, edukasyon at pagsasanay sa agrikultura.
“The MOA also includes the exchange of professionals, scientists, technicians and farmers for study and training,” pahayag ng Palasyo.
Binisita rin ng mga miyembro ng gabinete ang Philippines-Papua New Guinea Rice Demonstration Farm, na nasa loob ng Pacific Adventist University.
Layunin ng 25-ektaryang plantasyon na makapagtatag ng model seed farm, na maaaring pagkunan ng certified rice seeds para sa mga magsasaka ng Pacific Island nation. Ang demo plantation ay bahagi ng rice cooperation pact sa pagitan ng Pilipinas at Papua New Guinea na nagpadala ng 19 Filipino farm technicians at tax-free supplies at mga kagamitan sa Port Moresby.
Samantala, hinikayat naman ng Pangulo ang Papua New Guinea na pangalagaan ang kanilang mga sakahan at bantayan mula sa pagpasok ng “big money” mula sa mga kumpanya.
“You know Governor, most of the lands in the Philippines are not food crop. There are no more lands where we can plant to eat the palay. It’s overtaken by multinationals,” pagbabahagi ni Duterte.
“Be careful about that. Do not --- you may but do not allow the encroachment of multinationals because at the end of the day, what you would get is the salary of your people and yet the bulk --- it’s multinational, the bulk of the money goes to the company and goes everywhere” aniya.